Թուրքիայի արեւմուտքում գտնվող Աֆոնկարահիսար քաղաքի դպրոցի բարձր դասարաններում սովորող աշակերտը ատրճանակից կրակել է ուսուցչի վրա, որը նա դպրոց էր բերել կիթառի պատյանի մեջ թաքցրած, հայտնում է Cumhuriyet–ը։

Պարբերականի տվյալներով՝ դասերից փախած դպրոցականը վիճել է ուսուցչի հետ եւ կրակել է նրա ոտքին։ Վեճի պատճառը այս պահին հայտնի չէ։

Թերթը նշում է, որ դպրոցի ղեկավարությունը, լսելով կրակոցի ձայնը, ոստիկանություն է կանչել եւ բժիշկներ հրավիրել։ Վիրավոր ուսուցիչը շտապօգնության մեքենայով տեղափոխվել է քաղաքի հիվանդանոց։ Դպրոցականի հարազատներից շատերը, ստանալով միջադեպի մասին տեղեկությունը, ժամանել են դպրոց։

Պարբերականը հավելում է, որ ոստիկանությունը ձերբակալել է կրակող դպրոցականին։ Միջադեպի հետաքննությունը շարունակվում է։