2018թ. դեկտեմբերի 2-ին Գյումրիում դաժան ծեծի հետևանքով մահացած 57-ամյա Ջուլիետա Ղուկասյանի դիակի դատաբժշկան փորձաքննության եզրակացությունը ստացվել է։ Այս մասին NEWS.am–ին հայտնեց Ղուկասյանի իրավահաջորդի ներկայացուցիչներից Արայիկ Զալյանը։
Ավելի վաղ հայտնել ենք, որ 2018թ. դեկտեմբերի 2-ին Գյումրի քաղաքի Մայակովսկի փողոցի տներից մեկի դիմացից շտապօգնության մեքենայով «Գյումրի բժշկական կենտրոն» ՓԲ ընկերություն է տեղափոխվել 1961 թվականին ծնված Շիրակի մարզի բնակիչը, որը հիվանդանոցում մահացել է: Մահացածը Գյումրիի քաղաքապետարանի բնակկոմունալ բաժնի աշխատակից էր: Նա ընդգրկված է եղել Տիգրան Մեծ փողոցում աշխատող հավաքարարների բրիգադում: Նախնական տեղեկություներով՝ սպանությունը տեղի էր ունեցել այն ժամանակ, երբ կինը գնում էր աշխատանքի:
Դեպքի առթիվ Շիրակի մարզային քննչական վարչությունում հարուցվել է քրեական գործ՝ ՀՀ Քրեական օրենսգրքի 112-րդ հոդված 2-րդ մասի 14-րդ կետի հատկանիշներով, այն է՝ դիտավորությամբ առողջությանը ծանր վնասվածք պատճառելը, որն անզգուշությամբ առաջացրել է տուժողի մահը։
Գործով մեղադրանք է առաջադրվել 23-ամյա Ա․ Ռ․-ն պայմանագրային հիմունքներով, որպես վարորդ-մեխանիկ է աշխատում ռուսական 102-րդ ռազմաբազայում։
Հիշեցնենք, որ Ջուլիետա Ղուկասյանի իրավահաջորդի ներկայացուցիչները վարույթն իրականացնող մարմնից պահանջել են միջոցներ ձեռնարկել մեղադրյալ Ա. Ռ.-ին ռազմաբազայի տարածքից ՀՀ քրեակատարողական հիմնարկ տեղափոխելու համար: Նույն պահանջով Ղուկասյանի իրավահաջորդի ներկայացուցիչները դիմել են ՀՀ գլխավոր դատախազությանը։ Միջնորդությունների վերաբերյալ դեռևս որոշում չի կայացրել։
