Երեւանի ընդհանուր իրավասության դատարանը կրկին  որոշում է կայացրել կալանավորել Մարտի 1-ի գործով քննչական խմբի նախկին ղեկավար Վահագն Հարությունյանին։ Որոշումը կայացվել է դեռևս 2018 թ. դեկտեմբերի 30-ին։

NEWS.am-ի հետ զրույցում Հարությունյանի պաշտպան Միհրան Պողոսյանը նշեց, որ տեղյակ չեն եղել դատարանի որոշման մասին։

«Այսօր առավոտից  զանգահարել եմ քննիչին և փորձել ստանալ մեղադրանքի վերաբերյալ փաստաթղթերը, որպեսզի ներկա լինեի խափանման միջոցի հարցի քննությանը, սակայն մինչ այս պահը մեզ հասանելիք փաստաթղթերը չեն տրամադրել։ Այսօր պարզեցի, որ դատարանն առանց մեզ ծանուցելու խափանման միջոցի վերաբերյալ որոշում է կայացրել»,–ասաց նա՝ նշելով, որ դատարանն ու նախաքննական մարմինը խախտել են քրեական դատավարության նորմը՝  համաձայն որի  հետախուզման մեջ գտնվող մեղադրյալի  նկատմամբ կալանավորումը, որպես խափանման միջոց կիրառելու միջնորդությունը քննվում է պաշտպանի պարտադիր մասնակցությամբ։

Հիշեցնենք, որ 2018թ. տարեվերջին հայտնի դարձավ, որ Մարտի 1-ի գործով ապացույցներ կեղծելը կազմակերպելու համար մեղադրվող Վահագն Հարությունյանին առաջադրված մեղադրանքը լրացվել է։

Նա, որպես մեղադրյալ է ներգրավվել ՀՀ ՔՕ 308–րդ հոդվածի 2–րդ մասով (պաշտոնեական լիազորությունները չարաշահելը, որն անզգուշությամբ առաջացրել է ծանր հետևանքներ)  և 309–րդ հոդվածի 2–րդ մասով (պաշտոնեական լիազորություններն անցնելը, որը զուգորդվել է բռնություն, զենք կամ հատուկ միջոցներ գործադրելով): Նշենք, որ Երեւանի ընդհանուր իրավասության դատարանը Վահագն Հարությունյանին կալանավորելու որոշում էր կայացրել նաև 2018թ. նոյեմբերի 2–ին՝ առանձնապես ծանր հանցագործության վերաբերյալ քրեական գործով ապացույցներ կեղծելը կազմակերպելու համար։

Սակայն դեկտեմբերի 12–ին Վերաքննիչ քրեական դատարանը բեկանել էր առաջին ատյանի որոշումն ու վերացրել Վահագն Հարությունյանի նկատմամբ կիրառված խափանման միջոց կալանքի որոշումը։