ԱՄՆ-ում փորձաշրջան անցնող ուսանողուհիները էկզոտիկ մոլորակների որոնման Kepler աստղադիտակից ստացվող տեղեկատվության շնորհիվ հայտնաբերել են նոր հազվագյուտ մոլորակ: Ինչպես հաղորդել են ԱՄՆ Օդագնացության և տիեզերական տարածության հետազոտությունների ազգային գործակալությունում (NASA), այս մոլորակի վրա պայմանները կարող են հարմար լինել կյանքի համար, հաղորդում է ТАСС-ը:
K2-288Bb մոլորակը գտնվում է Երկրից 226 լուսային տարի հեռավորության վրա, Ցուլի համաստեղությունում: Այն գտնվում է K2-288 կրկնակի աստղային համակարգում՝ բաղկացած երկու սառը կարմիր թզուկներից, որոնք իրարից գտնվում են մոտավորապես 8,2 միլիարդ կմ հեռավորության վրա, մոտավորապես, ինչպես Արեւից մինչեւ Սատուրն: Մի աստղը երկու անգամ ավելի փոքր եւ թեթեւ է Արեւից, իսկ երկրորդի զանգվածը եւ չափը արեւի միայն մեկ երրորդն է կազմում: Այս փոքր աստղի ուղեծրում էլ հայտնաբերվել է այդ էկզոմոլորակը:
K2-288Bb-ի վրա մեկ տարին տեւում է ընդամենը 31.3 օր, իսկ նրա երկնքում միանգամից երկու «արեւ»-ներ են բարձրանում` կարմիր եւ խամրած: Մոլորակի չափը գրեթե կրկնակի մեծ է Երկրի չափից, սակայն գիտնականները դեռեւս չեն կարող ասել՝ արդյոք այն երկրային խմբի մոլորակ է՝ խիտ մակերեւույթով, թե՞ Նեպտունի նման գազային հսկա: Բայց ամենակարեւորն այն է, որ K2-288Bb-ը գտնվում է իր աստղի այսպես կոչված բնակելի գոտում, այսինքն, այնտեղ հնարավոր է լինի հեղուկ վիճակում ջուր եւ կյանք: