Հետխորհրդային տարածաշրջանում ինովացիոն ակտիվության ալիք է բարձրանում։ Սկսած Ռուսաստանից՝ մինչեւ Հայաստան եւ Բելառուս տեղի է ունեցել արդարության համար ինտերնետ-քարոզչությունների բռնկում։ Այս մասին բրիտանական The Guardian-ում հրապարակած իր հոդվածում գրում է վերլուծաբան եւ գրող Բարբարա Ֆոն Օֆրեյթագը։
Նրա խոսքերով՝ Հայաստանում քաղաքացիական հասարակության երիտասարդ ակտիվիստների լավատեսությունն ու էներգիան վարակիչ է։ «Բոլոր նրանք, ովքեր կարծում են, թե հետխորհրդային դարաշրջանում ամեն ինչ դատապարտված եւ մռայլ է, պետք է այցելեն Հայաստան»,- գրում է հեղինակը։
Նա նշում է, որ անցյալ տարի երիտասարդ ակտիվիստ-տեխնիկները կարեւոր դեր են կատարել ցույցերի ժամանակ, որոնք հանգեցրել են քաղաքացիների համընդհանուր մոբիլիզացիայի։ «Շփվելու նրանց կարողության շնորհիվ բողոքները խաղաղ բնույթ են կրել»,- գրում է հեղինակը։
Ընդհանրապես, ըստ վերլուծաբանի, այն, ինչը հուսադրում է Z սերնդի ակտիվիստների մեջ, այն է, որ նրանք գրավում են դիզայներներին, տեխնիկական փորձագետներին եւ նկարիչներին, որպեսզի թեսթավորեն աջակցության եւ քարոզչության անցկացման նոր ձեւեր։ Սա հանգեցրել է ցանցային մուլտիմեդիական ընկերությունների եւ սոցիալական հարցերով ինտերակտիվ խաղերի ստեղծմանը։ Դրանցից որոշները չաթ-բոտեր են օգտագործում մարդու իրավունքների խախտումներից տուժածների ակնթարթային աջակցության համար։