Արդեն մի քանի օր է՝ համացանցում տեղեկություններ են տարածվում, որ շուտով ազատ կարձակվի ցմահ ազատազրկման դատապարտված Մհեր Ենոքյանը։ Այսօր էլ տեղեկություն տարածվեց, որ ներման հանձնաժողովը՝ արդարադատության նախարար Արտակ Զեյնալյանի գլխավորությամբ, դրական եզրակացություն է տվել Մհեր Ենոքյանին ներում շնորհելու նախագծին, և օրերս նրան ներում կշնորհվի։
ՀՀ արդարադատության նախարարությունից NEWS.am–ին հայտնեցին, որ ներման հանձնաժողովի նիստերի օրակարգերում ընդգրկված հարցերը, մասնավորապես, որևէ դատապարտյալի որևէ խնդրագրի ու դրա ընթացքի վերաբերյալ տեղեկությունները, հրապարակման ենթակա չեն:
NEWS.am–ի հետ զրույցում Ենոքյանի ընտանիքի անդամները նշեցին, որ որևէ տեղեկություն չունեն ներման հանձնաժողովի եզրակացության վերաբերյալ։
Ավելի վաղ գործով տուժող Իոսիֆ Աղաջանովի հայրը (ըստ դատավճռի՝ նրան սպանել է Մհեր Ենոքյանը)՝ Միխայիլ Աղաջանովը, դիմել էր ՀՀ նախագահ Արմեն Սարգսյանին և ՀՀ վարչապետի պաշտոնակատար Նիկոլ Փաշինյանին՝ կոչ անելով մերժել Մհեր Ենոքյանին ներում շնորհելու խնդրագիրը։
«Սա այն դեպքը չէ, որ հայեցողական լիազորությամբ հրեշ մարդասպանը կարող է ներում ստանալ, նա գող կամ խաբեբա չէ, նա հարկ չի թաքցրել, նա իմ միակ որդուն ու մեզ է սպանել և արդեն 22 տարի»,– ասել էր որդեկորույս հայրը։
Նշենք, որ ցմահ դատապարտված Մհեր Ենոքյանը վերջերս արդարացվել էր իրեն մեղսագրված դրվագներից մեկով՝ փախուստի նախապատրաստության գործով։
Հիշեցնենք, որ Մհեր Ենոքյանը 1996-ին նոյեմբերի 29-ին դատապարտվել է մահապատժի՝ համակուրսեցի Իոսիֆ Աղաջանովին սպանելու համար։ Ըստ դատավճռի՝ հանցագործությունը Ենոքյանը կատարել է ընկերոջ՝ գյուղատնտեսական ինստիտուտի ուսանող Արամ Հարությունյանի հետ, որի տանը դաժանաբար սպանել են Իոսիֆ Աղաջանովին:
