Ամերիկյան Apple ընկերությունը պահանջարկի նվազման պատճառով (հատկապես Չինաստանում) ժամանակավորապես կրճատում է iPhone-ի արտադրությունը։ Հունվար-մարտ ամիսների համար արտադրողին պատվիրել են 10 տոկոսով ավելի պակաս սարքեր, քան ակնկալվում էր։ Այս մասին հայտնում է Nikkei Asian Review թերթը՝ վկայակոչելով տեղեկացված աղբյուրներին։

Կրճատման կենթարկվեն XS, XS Max եւ XR մոդելները։ Apple-ը դեռեւս որեւէ կերպ չի արձագանքել այս տեղեկատվությանը՝ հայտնում է DW-ն։

Apple-ը դժվարությունների է հանդիպում իր արտադրանքն իրացնելու հարցում։ Հատկապես Չինաստանում ԱՄՆ-ի հետ առեւտրային հակամարտության պատճառով ավելի ու ավելի շատ չինացիներ են հրաժարվում նորագույն եւ, հետեւաբար, ամենաթանկարժեք iPhone-ներից։

Շուկաների ուսումնասիրման Canalys ինստիտուտի գնահատականներով՝ 2018թ․ Չինաստանին սմարթֆոնների մատակարարումը կրճատվել է 12 տոկոսով։