Մարտի 1-ի գործով սահմանադրական կարգը տապալելու համար մեղադրվող ՀԱՊԿ նախկին գլխավոր քարտուղար Յուրի Խաչատուրովի մասնակցությամբ վերջին ամիսներին որևէ քննչական գործողություն չի կատարվել։ Այս մասին NEWS.am-ին հայտնեց Խաչատուրովի պաշտպան Միհրան Պողոսյանը։

Նա նշեց, որ լրացել է Խաչատուրովի նկատմամբ կալանավորումը թույլատրելի ճանաչելու վերաբերյալ առաջին ատյանի դատարանի որոշման դեմ ներկայացված վճռաբեկ բողոքը վարույթ ընդունելու կամ վարույթ ընդունելը մերժելու՝ օրենքով նախատեսված ժամկետը։

Պողոսյանը նշեց, որ մինչ օրս Վճռաբեկ դատարանից որոշում չեն ստացել։

Նշենք, որ Երևանի ընդհանուր իրավասության դատարանի դատավոր Դավիթ Բալայանը Խաչատուրովի նկատմամբ կալանքը որպես խափանման միջոց ընտրելու վերաբերյալ միջնորդությունը քննելիս հանգել էր հետևության, որ Խաչատուրովի նկատմամբ կալանավորումը թույլատրելի է, ապա  նրա նկատմամբ այլընտրանքային խափանման միջոց` գրավ կիրառելու որոշում կայացրել:

Միհրան Պողոսյանը բողոք էր ներկայացրել Խաչատուրովի նկատմամբ կալանավորումը թույլատրելի ճանաչելու որոշման դեմ: 2018թ. օգոստոսին Վերաքննիչ քրեական դատարանը մերժել էր Պողոսյանի բողոքը։ 15 օր անց փաստաբանն այս հարցի վերաբերյալ վճռաբեկ բողոք էր  ներկայացրել։

 Փաստաբանն իր բողոքում հայտնել էր, որ եթե դատարանները հաստատված են համարում այն փաստը, որ Խաչատուրովին առաջադրված մեղադանքի վերաբերյալ հիմնավոր կասկած առկա չէ, հետեւաբար չէր կարելի Խաչատուրովի նկատմամբ կալանավորումը թույլատրելի համարել։

Պողոսյանը բողոքում վկայակոչել էր նաև ԱԱԾ տնօրեն Արթուր Վանեցյանի և ՀՔԾ պետ Սասուն Խաչատրյանի հայտնի հեռախոսազրույցի գաղտնալսումը, որտեղ ըստ Պողոսյանի՝ ակնհայտ է դառնում, որ Խաչատուրովի նկատմամբ կալանքի կիրառումը ոչ  իրավաչափ նպատակ է հետապնդել։

Պողոսյանի խոսքով՝ Վճռաբեկ դատարանը խուսափում է այդ հարցի վերաբերյալ գնահատական տալուց.

«Ես չեմ զարմանա, որ Վճռաբեկ դատարանը բողոքը քննության չառնի։ Կարծում ենք՝ հերթական անգամ այս գործով  ծածկադմփոց անելու միտում կա, քանի որ ակնհայտ է, որ Խաչատուրովի նկատմամբ կալանքը թույլատրելի ճանաչելու որոշումը ոչ իրավաչափ է եղել»։

Հիշեցնենք, որ 2008 թ. մարտի 1-ից 2-ն ընկած ժամանակահատվածում Երևան քաղաքում տեղի ունեցած իրադարձությունների վերաբերյալ ՀՀ հատուկ քննչական ծառայությունում քննվող քրեական գործով ՀԱՊԿ գլխավոր քարտուղար Յուրի Խաչատուրովին 2018թ. հուլիսի 26-ին մեղադրանք է առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը: Հուլիսի 28-ին Երևանի ընդհանուր իրավասության դատարանի դատավոր Դավիթ Բալայանը Խաչատուրովի նկատմամբ որպես այլընտրանքային խափանման միջոց գրավը ճանաչել էր թույլատրելի: Գրավի չափ էր սահմանվել 5 մլն դրամը, ինչը վճարելուց հետո Խաչատուրովն ազատվել էր արգելանքից: Յուրի Խաչատուրովը  ՀԱՊԿ գլխավոր քարտուղարի պաշտոնից ազատվել է 2018թ. նոյեմբերի 2-ին և օրեր անց վերադարձել Հայաստան։