ՊԵԿ-ը իր պաշտոնական կայքէջում ներմուծել է նոր գործիք, որը ավտոմեքենա ներկրողներին հնարավորություն է տալիս առցանց համակարգով պարզել մաքսազերծման կողմնորոշիչ գինը: Այս մասին այսօր՝ հունվարի 10-ին, կառավարության նիստից հետո լրագրողների հետ զրույցում ասաց Պետական եկամուտների կոմիտեի նախագահ Դավիթ Անանյանը:
Նրա խոսքով՝ մաքսային ձեւակերպումները կատարվելու են հաշիվ ապրանքագրերի հիման վրա, պարզապես հաշվիչն օգնելու է քաղաքացիներին կողմնորոշման հարցում.«Որոշակի փոփոխությունների է ենթարկվել մեր մոտեցումը: Մենք մեր կայքէջում մի գործիք ենք ներմուծել, որը կոչվում է հաշվիչ: Դրա միջոցով ցանկացած անձ կարող է իր կողմից ներմուծվելիք մեքենայի տեղեկատվությունը մուտքագրելով ստանալ կողմնորոշիչ գին: Մենք ակնկալում ենք, որ այն ինվոյսները, որոնցով ներկրվելու են մեքենաները, պետք է կողմնորոշիչ գնին համահունչ լինեն կամ հավասար: Եթե բերելու են կասկածելի ինվոյսներով մեքենաներ, պետք է հաշվիչով գան ու մաքսազերծումն իրականացնեն: Եթե կողմնորոշիչ գնից շեղում կա, մենք ինվոյսը վերցնում ենք ու ուսումնասիրում: »:
ՊԵԿ-ը շեղումներ մինչ այժմ չի բացահայտել, կողմնորոշիչ գները մուտքագրված են շուկայանից ցածր, բայց դրանք մի քանի ամիսը մեկ փոփոխվելու են, որպեսզի ապահովվի տեղեկատվության համադրումը:
«Սա արել ենք, որ մարդիկ զերծ մնան ինվոյսներ կեղծելուց: Կան կազմակերպություններ, որոնցով զբաղվում ենք, որոնք օգնում են քաղաքացիներին կեղծել ինվոյսները: Նրանք նույնիսկ ունեն կապեր արտասահմանում »,- ասաց Անանյանը՝ հավելելով, որ կեղծիքները պարզելու են տարբեր գործիքներով, այդ թվում՝ տարբեր պետություններ հարցումներ կատարելու միջոցով:
ՊԵԿ նախագահը հայտնեց, որ վթարված մեքենայի արժեքն այսուհետ որոշելու է փորձագետը, ով տալու է եզրակացություն, ինչի հիման վրա էլ որոշվելու է գինը: «Նախկինում արել են այսպես՝ 1-ից 30% իջել են: Կարծում ենք, որ փորձագետի ներգրավվումը նվազեցնում է կոռուպցիոն ռիսկերը»,- նշեց նա: