Մենք ձգտում ենք ստեղծվող Բարձր տեխնոլոգիաների եւ ռազմաարդյունաբերական համալիրի նախարարության անվանումից հանել «ռազմաարդյունաբերական համալիր» հասկացությունը: Հունվարի 10-ին՝ կառավարության նիստից հետո լրագրողների հետ զրույցում այս մասին հայտարարեց տրանսպորտի, կապի եւ տեղեկատվական տեխնոլոգիաների նախարարի պաշտոնակատար Հակոբ Արշակյանը:
Նրա խոսքով՝ դա կապված է միջազգային գործընկերների հետ աշխատանքում հետագա բարդություններից խուսափելու փորձի հետ:
«Կձեւավորվի Բարձր տեխնոլոգիաների եւ արդյունաբերության նախարարություն, որը կզբաղվի բարձր տեխնոլոգիաների ոլորտում ներդրողներին ներգրավմամբ, բարձր տեխնոլոգիական արտադրանքի կազմակերպմամբ եւ վաճառքով», - բացատրեց Արշակյանը:
Նախարարի պաշտոնակատարը նշեց, որ Տրանսպորտի նախարարության եւ տարածքային կառավարման եւ զարգացման նախարարության միավորումը ճանապարհային շինարարության ոլորտում ավելի արդյունավետ աշխատանք է ապահովելու:
Խոսելով աջ ղեկով մեքենաների ներկրման հարցի մասին՝ նա նշեց, որ կարեւոր է շեշտել, որ աջ ղեկով մեքենաների ներկրումն արգելված է եւ այդ արգելքը չի վերացվել:
«Օրինագիծը, որը կա e-draft կայքում, շրջանառության մեջ է դրվել միայն այն նպատակով, որ սահմանին կուտակված մեքենաներին թույլ տրվի Հայաստան մտնել (նախատեսվում է արգելքի վերջնական ժամկետ սահմանել ապրիլի 1-ը-խմբ.): Սակայն դա կարող է իրականացվել միայն խորհրդարանում օրինագծի ընդունումից հետո», - ասաց նա:
