Կառավարության կառուցվածքային փոփոխությունների նախագծին դեմ ենք, որովհետեւ սուպերվարչապետական համակարգն այդ նախագծով պահպանված է: Այս մասին, ԱԺ մանդատների հանձնման արարողության ժամանակ լրագրողների հետ զրույցում նշեց «Լուսավոր Հայաստան» կուսակցության ղեկավար, ԱԺ պատգամավոր Էդմոն Մարուքյանը՝ անդրադառնալով նախարարությունների օպտիմալացման վերաբերյալ շրջանառվող նախագծին:
«Այն ինչ չէր կարելի Սերժ Սարգսյանին, չի կարելի նաեւ այսօրվա իշխանություններին: Հետեւաբար ԱԱԾ-ն, ՊԵԿ-ը, Ոստիկանությունը պետք է վերադառնան խորհրդարանական վերահսկողության տակ»,-ասաց նա:
Հարցին, թե «Իմ քայլը» դաշինքից վիրավորվածություն չկա՞, որ միասին ճանապարհ են անցել, իսկ հիմա նրանք ԱԺ փոխնախագահի պաշտոնում աջակցելու են ԲՀԿ թեկնածուին, Մարուքյանը պատասխանեց. «Հո հորողբորս տղերքը չեն, որ վիրավորվեմ: Պետությանն անհրաժեշտ է եղել, միասին ճանապարհ ենք գնացել, հիմա պետք է, որ ընդդիմությունն իր գործառույթն իրականացնի, հիմա էլ էսպես պետք է անենք: Վիրավորվելը քաղաքական կատեգորիա չէ: Քաղաքականության մեջ ոչ թե վիրավորվում ես, այլ հետեւություններ ես անում»:
Հարցին, թե մտավախություն չունի՞, որ իրենց կանվանեն հակահեղափոխական, Մարուքյանն արձագանքեց. «Հեղափոխությունն ավարտված է, այն արդեն եղել է, չկա հակահեղափոխություն: 10 տարի հեղափոխություն չի լինում, հեղափոխությունը եղել ու ավարտվել է: Ընտրությունների արդյունքներով հեղափոխությունն արձանագրվել ու արմատավորվել է եւ այլեւս հակահեղափոխություն գոյություն չունի»:
