Ամերիկյան պետությունների կազմակերպությունը (ԱՊԿ) անօրինական է համարում Վենեսուելայի նախագահ Նիկոլաս Մադուրոյի պաշտոնավարման երկրորդ ժամկետը, որի երդմնակալությունը տեղի ունեցավ հունվարի 10-ին: Մշտական խորհրդի 19 անդամներ քվեարկել են այս այս դիրքորոշման օգտին, ասվում է ԱՊԿ հայտարարության մեջ: 6 անդամ դեմ է արտահայտվել, եւս 8-ը՝ ձեռնպահ մնացել, հաղորդում է DW-ն:
«Կազմակերպությունը նշում է, որ վենեսուելացի բոլոր քաղաքական գործիչների մասնակցությամբ երկխոսությունը պարտադիր է ազգային հաշտության հասնելու համար»: Անհրաժեշտ է նոր ընտրությունների անցկացման պայմանները համաձայնեցնել, որոնք իսկապես արտացոլում են Վենեսուելայի քաղաքացիների կամքը եւ խաղաղ կկարգավորեն առկա ճգնաժամը:
Բացի այդ, Պարագվայը խզել է դիվանագիտական հարաբերությունները Վենեսուելայի հետ: Պերուն իր հերթին, որպես բողոքի նշան Կարակասից հետ է կանչել իր ժամանակավոր հավատարմատարին եւ արգելել Մադուրոյի վարչակազմի հարյուր անդամների մուտքը երկիր:
Վենեսուելայում նախագահական ընտրությունները տեղի են ունեցել 2018 թ. մայիսին: ԿԸՀ տվյալներով գործող նախագահ Նիկոլաս Մադուրոն հաղթանակ էր տարել՝ ստանալով ձայների մոտ 70 տոկոսը: Վենեսուելայի նախագահը ընտրվում է 6 տարով:
Չճանաչելով Մադուրոյի հաղթանակը՝ մի շարք արեւմտյան եւ լատինամերիկյան երկրներ իրենց դեսպաններին հետ էին կանչել Կարակասից: ԱՄՆ նախագահ Դոնալդ Թրամփը հայտարարել էր, որ Վաշինգթոնը չի ճանաչում այս երկրում նախագահական ընտրությունների արդյունքները եւ Վենեսուելայի նկատմամբ պատժամիջոցները խստացնելու մասին հրամանագիր էր ստորագրել:
