Կանադան աշխատում է Միացյալ Նահանգների քաղաքական գործիչների եւ բիզնեսմենների հետ, որպեսզի ճնշում գործադրեն երկրի նախագահ Դոնալդ Թրամփի վրա՝ նրան ստիպելու հրաժարվել պողպատի եւ ալյումինի ներմուծման սակագներից: Այս մասին հայտարարել է Կանադայի վարչապետ Ջասթին Թրյուդոն, փոխանցում է Reuters-ը:
Թրամփը մաքսատուրքեր էր սահմանել անցյալ տարվա մայիսին՝ հղում կատարելով ազգային անվտանգությանը: Կանադան այս քայլը դատապարտել էր եւ նախապես հրաժարվել Միացյալ Նահանգների ու Մեքսիկայի հետ ստորագրել առեւտրի մասին նոր պայմանագիրը, եթե մաքսատուրքերը չեղյալ չհայտարարվեն:
Թրյուդոն, որն, ի վերջո, անցյալ տարվա նոյեմբերին ստորագրել էր ԱՄՆ-ի, Մեքսիկայի եւ Կանադայի միջեւ կնքված համաձայնագիրը (USMCA), հայտարարել է, որ երկրի կառավարությունը փորձում է փոխել Թրամփի կարծիքը:
«Մենք արդեն աշխատել ենք Կոնգրեսի անդամների, նահանգապետների, գործարար գործընկերների հետ, որոնց վրա այդ մաքսատուրքերը բացասաբար են ազդում…որպեսզի նախագահի վրա ճնշում գործադրեն»,- ասել է նա:
Հարցին՝ ինչո՞ւ է ստորագրել գործող սակագներով USMCA-ն, Թրյուդոն պատասխանել է, որ գործարքի կնքումը «Միացյալ Նահանգներում անկանխատեսելիության եւ հովանավորչության ժամանակներում բոլոր կանադացիների համար ահռելի առաջնայնություն էր»:
Կանադան իր արտահանվող ամբողջ ապրանքի 75 տոկոսը Միացյալ Նահանգներ է ուղարկում:
