«Բարգավաճ Հայաստան» կուսակցության առաջնորդ Գագիկ Ծառուկյանը պնդում է՝ Էդմոն Մարուքյանի հետ բանավեճի թեման փակված է, տարաձայնություններ չկան։

Այսօր՝ հունվարի 14-ին, լրագրողների հետ զրույցում նա ասաց. «Բանավեճ ա եղել, ինքն ասել ա, ես պատասխանել եմ»։ 

Հարցին՝ այսինքն սպառված է բանավեճը, Ծառուկյանը պատասխանեց. «Իհարկե սպառված ա, հիմա մարդ ա, մարդիկ իրար հետ բանավիճել են, թեման փակվել ա, ինչի մասին ա խոսքը»։ 

Հիշեցնենք, որ «Լուսավոր Հայաստան» կուսակցության առաջնորդ Էդմոն Մարուքյանը Հանրային հեռուստաընկերության ուղիղ եթերում նախընտրական բանավեճի ժամանակ ԲՀԿ առաջնորդ Գագիկ Ծառուկյանից հետաքրքրվել էր, թե որն է իր մոտիվացիան, ինչ կարիք կա պատգամավոր դառնալու։

«Ձեր բիզնեսը պաշտպանելու ենք, ես անձամբ պատրաստ եմ պաշտպանել»,– Ծառուկյանին դիմել է Մարուքյանը։

Ի պատասխան ԲՀԿ առաջնորդը հայտարարել էր, որ ինքը պաշտպանության կարիք չունի, ապա հետաքրքրվել, թե Մարուքյանն իր կյանքում ինչ է արել։

«Ես կլասիկ պատգամավոր եմ»,– նշել էր Մարուքյանը, ինչին Ծառուկյանն արձագանքել էր. «Ես քո կլասիկ ցավը տանեմ... Էդ որ պատգամավոր էին ընտրվում, ո՞վ էր քեզ աջակցում։ Գեւորգին ճանաչո՞ւմ ես, որ քո քարոզարշավն էր կազմակերպում, պիտի գայիր, ճանապարհին իմացար, որ թղթերդ պակաս են, չեկար։  Չի կարելի դեմագոգություն անել, Մարուքյան»։

Էդմոն Մարուքյանը կտրականապես հերքել էր, որ ինքն այդ հարցով Ծառուկյանի մոտ գնալու մտադրություն է ունեցել։