Նախկինում տարածված է եղել հիվանդոտ տեսակետ, թե հայ-վրացական հարաբերություններում չկան խնդիրներ, որոնք լուծելի չլինեն: Այս մասին, այսօրէ՝ հունվարի 14-ին, ԱԺ նիստում իր լույթում նշեց «Իմ քայլը» խմբակցության պատգամավոր Շիրակ Թորոսյանը:
«Այո, ես էլ եմ դրա հետ համաձայն, որ որպեսզի դրանք լուծվեն, նախ պետք է անվանել այդ խնդիրները, մտցնել երկկող հարաբերությունների օրակարգ ու տալ լուծումներ, ոչ թե ասել, որ երկկողմ խնդիրներ չկան, անտեսել դրանք եւ թողնել, որ դրանք անընդհատ խորանալ:
Ջավախահայության խնդիրները վերջին տարիներին սրվեցին, թուրք-ադրբեջանական տանդեմի աստիճանաբար Վրաստանում ձեռք բերած ազդեցությանը զուգահեռ:
Մենք պետք է շատ նուբ, բովանդակային ու նպատակային աշխատենք Վրաստանի հետ, որպեսզի թուրք-ադրբեջանական տանդեմը չեզոքացնենք եւ կարողանանք նաեւ լուծել վրացահայության, ջավախահայության խնդիրները»,-հայտարարեց Թորոսյանը:
Նրա խոսքով, օրինակ, երկար ժամանակ է, ասում են հնարավոր չէ հայկական գիրք, թերթ, անգամ բուկլետ անցկացնել Ջավախք, ինչը նորմալ չէ. «Այս հարցը քննարկվե՞լ է, փորձե՞լ են լուծումներ տալ, ես չգիտեմ»,-ասաց նա:
«Կամ, ասենք, ՀՀ-ն որոշել է, ու այս տարվա հունվարի 1-ից սահմանային անցման բեռի չափը չի կարող գերազանցել 25 կգ-ն, նախկին 50 կգ-ի փոխարեն: Ասենք, ջավախքցի ուսանողը գալիս է ուսանելու Հայաստանում եւ իր հետ բերում է մեկ պարկ կարտոֆիլ, որը 50 կգ է: Ինչ անի, քիչ-քիչ մտցնի Հայաստան, թե՞ մաքսազերծի իր հանպազօրյա անհրաժեշտությունը»,-ասաց Շիրակ Թորոսյանը՝ հավելելով, որ երկու երկրների հարցերը պետք է քննարկվեն ու լուծվեն եւ չպետք է նրանք իրար գործողություններում դավադրություն փնտրեն:
