Միխայիլ Խաչատրյանի մայրը, որի որդու սպանության մեջ կասկածվում են նրա երեք թոռնուհիները, փորձում է բնակարանի գրանցումից հանել նրանցից մեկին՝ իր ավագ թոռնուհի Քրիստինային: Կինը հայցով դատարան է դիմել: Ավելի վաղ դատարանի որոշմամբ արդեն պաշտոնապես բնակարանից վտարվել է աղջիկների մայրը՝ Աուերիլան եւ նրանց ավագ եղբայրը՝ Սերգեյը, գրում է ՄԿ-ն:
Լիդա Մարտիրոսովնան հայցով դիմել էր Բուտիրսկի դատարան՝ իր երկսենյականոց բնակարանից Քրիստինա Խաչատրյանին գրանցումից հանելու համար: Հանգուցյալ Միխայիլ Խաչատրյանի քրոջ՝ Նաիրայի խոսքով նրա մայրը ստիպված էր հեռանալ բնակարանից, քանի որ աղջիկները ծաղրում էին նրան, երբ նրանց հայրը Երուսաղեմ էր մեկնել:
Լիդա Մարտիրոսովնան իբրեւ թե, չէր ցանկացել բողոքել որդուն՝ նրան ազատելով ավելորդ ապրումներից, որոնք կարող էին վատ անդրադառնալ նրա առանց այդ էլ թույլ առողջության վրա:
Այդ բնակարանում գրանցված ենք մենք՝ Միշայի բոլոր չորս քույրերը, նրա զարմիկ Արսենը եւ բնակարանի սեփականատեր Լիդա Մարտիրոսովնան:
Մայրս այդպես էլ ասաց, որ նա հավերժ չէ եւ քանի դեռ ողջ է, նա ցանկանում է իր բնակարանից դուրս հանել իր որդու մարդասպանին, պատմում է Նաիրան:
Բացի այդ հայցադիմումում Միխայիլ Խաչատրյանի մայրը նշել է, որ Քրիստինան երբեւէ չի վճարել կոմունալ վճարները եւ բնակարանի պատշաճ վիճակի պահպանման համար ոչ մի մասնակցություն չի ունեցել:
Բացի այդ ըստ ազգականների՝ դեռ հոր կենդանության ժամանակ Քրիստինայի պարտականությունների մեջ էին մտնում կոմունալ վճարները, բայց Միխայիլ Խաչատրյանի դեմ դաժան հաշվեհարդար տեսնելուց հետո պարզվել է, որ իբրեւ թե կոմունալ վճարներից պարտք է առաջացել՝ ընդհանուր 70 հազար ռուբլի չափով:
Դատական նիստը նշանակվել է հունվարի 21-ին:
Ավելի վաղ՝ նոյեմբերի 1-ին Բուտիրսկի դատարանն արդեն Լիդիա Մարտիրոսովնայի հայցով որոշում էր ընդունել բնակարանից Միխայիլ Խաչատրյանի այրու եւ նրանց ավագ որդու վտարման մասին:
