ԱՄՆ պետքարտուղար Մայք Պոմպեոն հայտարարել է, որ նախագահ Դոնալդ Թրամփի հայտարարությունը Թուրքիայի տնտեսության «ոչնչացման» մասին՝ սիրիական քրդերի վրա հարձակման դեպքում, ընդգծում է Վաշինգտոնի հավատարմությունն իր գործընկերներին, հաղորդում է AP-ին:
Նրա խոսքերով, ինքը չի քննարկել Թրամփի հայտարարությունը հենց նրա կամ թուրք պաշտոնյաների հետ: Միեւնույն ժամանակ, Պոմպեոն ենթադրել է, որ Թրամփը նկատի է ունեցել պատժամիջոցների կիրառումը, եթե Անկարան ռազմական գործողություն ձեռնարկի Սիրիայում քրդերի՝ ԱՄՆ-ի դաշնակիցների դեմ՝ «Իսլամական պետության» հետ պայքարում։
«Վարչակազմը շատ հետեւողական է եղել իր պահանջում, որպեսզի թուրքերը չհետապնդեն քրդերին անհարկի միջոցներով»,-ասել է Պոմպեոն: «Եթե նրանք ահաբեկիչներ են, ապա մենք մտադիր ենք ոչնչացնել ծայրահեղականներին, որտեղ էլ որ նրանց գտնենք: Կարծում եմ՝ այս առավոտ նախագահի արած մեկնաբանությունները համապատասխանում են դրան»:
Կոնկրետ հարցին՝ ինչ է Թրամփը նկատի ունեցել Թուրքիայի տնտեսությունը ոչնչացնելու ներքո, Պոմպեոն պատասխանել է. «Մենք աշխարհում պատժամիջոցներ ենք կիրառում շատ դեպքերում։ Կարծում եմ, որ նա դա նկատի ուներ, բայց դուք պետք է հարցնեք նրան»:
Թրամփի թվիթը Անկարայի կտրուկ արձագանքն է առաջացրել, իսկ թուրքական լիրան ԱՄՆ դոլարի նկատմամբ 0,84 տոկոսով կորցրել է իր արժեքը երկուշաբթի՝ ԱՄՆ նախագահի սպառնալիքից հետո։
Թուրքիայի նախագահ Ռեջեփ Թայիփ Էրդողանի մամուլի խոսնակը պատասխանել է Թրամփին Twitter-ով՝ նշելով, որ Թուրքիան «պայքարում է ահաբեկիչների դեմ, այլ ոչ թե քրդերի»: «Ահաբեկիչները չեն կարող լինել ձեր գործընկերներն ու դաշնակիցները», - գրել է Իբրահիմ Կալինը:
