Ես հասկանում եմ, որ տարբեր քաղաքական գործիչներ կարող են քաղաքական կոռեկտության, քաղաքական բառապաշարի հետ կապված խնդրներ ունենալ. Կապրենք կտեսնենք, թե ինչպիսի ընդդիմություն կլինի ԲՀԿ-ն, եւ ինչպիսին կլինի նոր խորհրդարանը: Այս մասին, այսօր՝ հունվարի 15-ին, ԱԺ-ում լրագրողների հետ զրույցում նշեց ԲՀԿ խմբակցության պատգամավոր Նաիրա Զոհրաբյանը՝ անդրադառնալով ԱԺ նախկին փոխնախագահ Էդուարդ Շարմազանովի այն հայտարարությանը, որ նոր ԱԺ-ում չկա ընդդիմություն, որ սա քայլ է դեպի ԽՄԿԿ:
«Ես ոչ մեկին խորհուրդ չեմ տալիս կանխակալ գնահատականներ հնչեցնել, հատկապես ԲՀԿ-ի մասով: Մենք քանիցս ասել ենք, որ կողմ ենք կոռեկտ փոխհարաբերությունների բոլորի հետ: Ով խախտեց կոռեկտության սահմանը, մի քանի անգամ ավելին ստանալու է: Ես կողմ եմ ակն ընդ ական, ատամն ընդ ատաման սկզբունքին»,-ասաց Զոհրաբյանը:
Հարցին, թե ԱԺ հանձնաժողովներից որ երկուսն է ընտրելու ԲՀԿ-ն, Նաիրա Զոհրաբյանը նշեց, որ իհարկե, կա Դոնթի բանաձեւ, որով քաղաքական ուժերը կարող են ըստ հերթականության հայտնել իրենց նախապատվությունը, բայց այս անգամ իրենք գնացել են քաղաքական կոնսուլտացիաների ճանապարհով: Նա չցանկացավ այս պահին նշել, թե այդ խորհրդակցությունների արդյունքում որ հանձնաժողովներն են լինելու ԲՀԿ-ինը:
Նա հավելեց, որ ԱԺ փոխնախագահների ընտրության հարցում եւս քաղաքական կոնսենսուս ունեն:
Նշենք, որ նոր ԱԺ-ն կունենա 11 հանձնաժողով, որից, ըստ Դոնթի բանաձեւի երկուսը բաժին կհասնի ԲՀԿ-ին, մեկւ՝ «Լուսավոր Հայաստանին»: