ՀՀ երկրորդ նախագահ Ռոբերտ Քոչարյանի պաշտպանները քիչ առաջ երկրորդ ինքնաբացարակի միջնորդությունը ներկայացրեցին Քոչարյանի խափանման միջոցի հարցը քննող դատավոր Արթուր Մկրտչյանին։
Լրագրողների հետ զրույցում Քոչարյանի պաշտպաններից Արամ Օրբելյանն ասաց, որ հայտնի չէ, թե ինչի հիման վրա է գործը մակագրվել հենց այս դատավորին։ Ըստ պաշտպանի՝ այդ կերպ կասկածի տակ է դրվում դատարանի՝ օրենքի հիման վրա ստեղծված լինելու հանագամանքը:
Նա նաեւ հիշեցրեց, որ նախորդ դատավորը հենց այս հիմքով էր ինքնաբացարկ հայտնել: Խոսքը դատավոր Դավիթ Գրիգորյանի մասին է, ով հունվարի 12-ին ինքնաբացարկ էր հայտնել, պատճառաբանելով, որ այդ օրը ինքը հերթապահ չի եղել սակայն գործն իրեն մակագրվել:
Դատարանը խորհրդակցական սենյակից վերադառնալուց հետո որոշում կայացրեց մերժել միջնորդությունը՝ պատճառաբանելով, որ դատարանի նախագահը կարող էր գործը մակագրել այդ օրվա հերթապահ դատավորներից մեկին:
Դատական նիստը մեկ ժամով ընդմիջվեց:
Նշենք, որ Ռոբերտ Քոչարյանի նկատմամբ ընտրված կալանավորումն այլընտրանքային խափանման միջոց գրավով փոխարինելու վերաբերյալ միջնորդություն են ներկայացրել Քոչարյանի պաշտպանները, իսկ ՀՔԾ–ն միջնորդել է եւս երկու ամիս ժամկետով երկարաձգել Քոչարյանի կալանքի ժամկետը։ Այս երկու գործն էլ քննելու է դատավոր Արթուր Մկրտչյանը։ Հիշեցնենք, որ Ռոբերտ Քոչարյանի պաշտպանները կալանավորումը գրավով փոխարինելու վերաբերյալ միջնորդությունը ներկայացրել են դեռեւս նախորդ տարի՝ դեկտեմբերի 26-ին, եւ դատարանին խնդրել են որոշել սահմանվող գրավի չափը: