Երբ խոսում ենք հուշարձանների պաշտպանություն, ես չեմ հավատում, որ ՀՀ կառավարությունը եւ Երեւանի ղեկավարությունը, եթե նպատակ դնեն ինչ–որ շենք պահպանել, դա հնարավոր չլինի անել։ Այս մասին այսօր՝ հունվարի 15-ին, Երեւան քաղաքի ավագանու արտահերթ նիստին ասաց ավագանու «Իմ քայլը» խմբակցության անդամ Արսեն Կարապետյանը՝ խոսելով Արամի 23–ում շենքի պատի փլուզման հարցին։
Նրա համոզմամբ՝ տեխնիկական տեսանկյունից որեւէ խնդիր չկա, պետք է մեծ ցանկություն ունենալ. «Այդ շենքը 120 տարի կանգնած էր անվնաս, խնդիրներ առաջացան այն ժամանակ, երբ քաղաքի նախկին իշխանությունները ոչ այդքան ճիշտ նախագիծ հաստատեցին եւ թույլ տվեցին փոսը քանդել ոչ ճիշտ տեխնիկական տեսակետից»։
Արսեն Կարապետյանը շեշտեց՝ այսպիսի հարցերում վերջին մեղավորը միշտ պատվիրատուն է. «Այսինքն՝ եթե մենք հստակ խաղի կանոններ առաջարկենք, որեւէ պատվիրատու չեմ կարծում դեմ գնա քաղաքի որոշումներին»։
Ավագանու անդամը նշեց՝ իրեն չի հետաքրքրում գերատեսչական մարմինների դիրքորոշումը այդ հարցում.«Մենք պատասխանատու ենք քաղաքի տարածքում մշակութային ժառանգության պաշտպանության համար, եւ անձամբ ինձ շատ քիչ է հետաքրքրում թե այս կամ այն գերատեսչությունը ոնց է դրան վերաբերում եւ ում է մեղավոր համարում դրանում, մենք պետք է անենք հնարավորն ու անհնարը մեր մշակութային ժառանգությունը պահպանելու համար»։
Նշենք, որ Արամի 23 շենքում, որի պատը օրերս փլուզվել էր, տեղակայված է Տիգրան Հեքեքյանի գլխավորած «Հայաստանի փոքրիկ երգիչներ» երգչախումբը։ Նրանք ամիսներ շարունակ ահազանգում էին շենքի սարսափելի վիճակի մասին։