Դա ջենտլմենական ժետ էր, քանի որ կինը պարտվել էր տղամարդուն: Հունվարի 15-ին լրագրողների հետ զրույցում այս մասին ասաց «Լուսավոր Հայաստան» կուսակցության ղեկավար Էդմոն Մարուքյանը՝ մեկնաբանելով ԲՀԿ-ից ԱԺ-ի նորընտիր փոխնախագահ Վահե Էնֆիաջյանի ժեստը, որը պաշտոնում ընտրվելուց հետո «Լուսավոր Հայաստանից» իր հակառակորդ Մանե Թանդիլյանին ծաղկեփունջ նվիրեց:
Կուսակցության ղեկավարի խոսքով՝ «Լուսավոր Հայաստանը» եւ նրանց խմբակցությունը ողջունում են Էնֆիաջյանի ժեստը:
«Բայց եթե այնպես ստացվեր, որ նա պարտվեր, ապա մենք էլ նրան ինչ-որ բան կնվիրեինք: Դրամապանակ կամ օծանելիք կնվիրեինք», - ասաց Մարուքյանը:
Լրագրողների հարցին՝ կարող է արդյոք այդ ծաղկեփունջը թուլացնել երկու քաղաքական ուժերի միջեւ ծագած լարվածությունը, Մարուքյանն ասաց, որ իրենց միջեւ ոչ մի լարվածություն չկա:
«Ես արդեն հազար անգամ ասել եմ, որ ընտրում էր «Իմ քայլը» խմբակցությունը: Ես այդ մասին ասել եմ իմ ելույթի ժամանակ», - ընդգծեց նա:
Հիշեցնենք, որ ընդդիմությունից ԱԺ-ի փոխնախագահի ընտրության հարցով քվեարկությանը «Իմ քայլը» խմբակցության աջակցության շնորհիվ պատգամավորների ճնշող մեծամասնությամբ ընտրվեց ԲՀԿ-ից պատգամավոր Վահե Էնֆիաջյանը: