Բռնակալի օրենսդրական բազան շատ է դուր եկել վարչապետին։ Այս մասին NEWS.am-ի թղթակցի հետ զրույցում հայտարարեց «Երկիր ծիրանի» կուսակցության նախագահ Զարուհի Փոստանջյանը։

Նրա խոսքով, Նիկոլ Փաշինյանը իշխանության է եկել հենց այդ նպատակով։ «Նա եկել է իշխանության բռնակալական ռեժիմը առնվազն մինչեւ 2020թ․ պահպանելու առաքելությամբ։ Այդ պատճառով մոտակա 6 ամիսներին խորհրդարանի օրակարգում չի լինի ո՛չ սահմանադրության դրույթների փոփոխություն, ո՛չ Ընտրական օրենսգրքի բարեփոխումներ»,- նշեց նա։

Խոսելով կառավարության կառուցվածքի առաջիկա բարեփոխումներին մասին՝ Փոստանջյանն ընդգծեց, որ պետական կառավարման համակարգի աշխատանքի օպտիմալացումը կարեւոր նախարարությունների կրճատման ճանապարհով արդարացված չէ։ «Ունենալով ինը միլիոնանոց սփյուռք՝ չի կարելի որակյալ աշխատանք կատարել արտասահմանում ապրող հայերի հետ եւ ներգրավել նրանց պետական շինարարության մեջ՝ չունենալով նախարարություն։ Հաշվի առնելով, որ մեր երկրի բնակչության մեծ մասը ներգրավված է գյուղատնտեսական ոլորտում, անհասկանալի է, թե ինչպես պետք է կազմակերպվի այս ոլորտի աշխատանքը առանց մասնագիտացած պետական մարմնի, այսինքն՝ գյուղատնտեսության նախարարության»,- նշեց նա։