Այն, որ ԱԺ նախագահը պետք է լիներ «Իմ քայլը» դաշինքից, որևէ կասկած չկար, և դաշինքն առաջադրեց իր թեկնածուին, հասկանալի էր նաեւ, որ ԲՀԿ-ն կողմ քվեարկեց Արարատ Միրզոյանի թեկնածությանը, քանի որ «Իմ քայլը» պաշտպանելու էր ԲՀԿ-ի թեկնածուին փոխնախագահի պաշտոնում, բայց ամբողջովին անհասկանալի էր «Լուսավոր Հայաստանի» կողմ քվեարկելը․ այս մասին NEWS.am-ի հետ զրույցում ասաց քաղաքագետ Արմեն Բադալյանը։ Նրա խոսքով՝ այս կուսակցությունը այլ տեսլական ունի եւ դիրքորոշումով չափավոր արեւմտամետ է, եւ այս ֆոնին անտրամաբանական էր նրանց կողմ քվեարկությունը։ «Լուսավոր Հայաստանը», ըստ քաղսքագետի, չի կարողանում իր դեմքով ներկայանալ, իր եղած իմիջը պահպանելու փոխարեն այն կոտրելու քայլեր է անում, հետեւաբար Արմեն Բադալյանը կարծում է, որ այս քվեարկությունից հետո ԼՀԿ-ն գցեց իր վարկանիշը եւ իմիջային կորուստ կունենա․ «Չեմ կարող ասել ինչքան՝ 1 տոկոս, 5 տոկոս, թե 10 տոկոս, բայց իմիջային անկում տեղի կունենա»,- նշեց նա։
Իսկ որ ընդդիմադիր փոխնախագահի պաշտոնում «Իմ քայլը» նախապատվություն տվեց ԲՀԿ-ի թեկնածուին, քաղաքագետի կարծիքով, ճիշտ էր․ «Ընտրողները գնահատել են քաղաքական ուժերի աշխատանքը, որակը, կշիռը․ ոսկե մեդալ ստացել է «Իմ քայլը» դաշինքը, արծաթը ստացել է ԲՀԿ-ն, և բնականաբար ստացել է ԱԺ փոխնախագահի պաշտոնը, ԼՀԿ-ն անհաջող նախընտրական քարոզարշավի հետեւանքով ստացել է բրոնզը, և կարող է ստանալ հանձնաժողովի մեկ նախագահի պաշտոն»,- ասաց նա՝ ընդգծելով, որ սա մրցույթ էր, որի ժյուրին ժողովուրդն էր, եւ եթե «Իմ քայլն» այլ կերպ քվեարկեր, կնշանակեր՝ վերանայում է ժողովրդի գնահատականը։ Քաղաքագետի կարծիքով հակառակ սցենարն այլ վտանգներ էլ ունի․ հետագայում որեւէ ուժ կմտածեր, որ իր խնդիրը ոչ թե ընտրություններում հաղթելն է և մեծամասնություն ձեւավորելը, այլ հաղթահարել 5 տոկոսանոց շեմը, և հետո սկսել կուլիսային բանակցություններ, այսինքն՝ փորձել դուր գալ ոչ թե ընտրողներին, այլ իշխող ուժին՝ մի բան, որ հատուկ էր ՀՀԿ-ի իշխանությանը։
Այնուամենայնիվ, ըստ նրա՝ տարակուսելի էր նաեւ «Իմ քայլի» միահամուռ քվեարկությունը․ քաղաքագետն ակնալում էր, որ 88 պատգամավորի մեջ կլինեին նաեւ մի քանիսը, որ կքեվարկեն ոչ թե թելադրանքով, այլ խղճի մտոք, այլապես․ ասաց, «Իմ քայլը» վերածվում է մի բանակի, որի հրամանատարը ինչ որոշի, այնպես էլ կանեն, ինչը ցանկալի երևույթ չէ․ «ուրեմն հետագայում կառավարությունը ինչ օրինագիծ բերի, բոլորը միանշանակ կո՞ղմ են քվեարկելու, բա ո՞ւր մնաց ներկուսակցական ժողովրդավարությունը»,- եզրափակեց քաղաքագետը։