Ազգային ժողովը շարունակում է հունվարի 14-ին մեկնարկած իր անդրանիկ նստաշրջանը: Նշենք, որ վերջին երկու օրերին խորհրդարանը հասցրեց ընտրել ԱԺ նախագահ (այդ պաշտոնում միաձայն ընտրվեց Արարատ Միրզոյանը), ԱԺ փոխնախագահներ (Լենա Նազարյան, Ալեն Սիմոնյան եւ Վահե Էնֆիաջյան) (ֆոտոռեպորտաժ):
Այսօր ԱԺ-ն կշարունակի ԱԺ մշտական հանձնաժողովների նախագահների ընտրության հարցի քննարկումը: Նշենք, որ նոր խորհրդարանը 9-ի փոխարեն կունենա 11 մշտական հանձնաժողով, որից 8-ը բաժին կհասնի «Իմ քայլը» դաշինքին, երկուսը՝ ԲՀԿ-ին եւ մեկը՝ «Լուսավոր Հայաստանին»:
ԱԺ անդրանիկ նստաշրջանի օրակարգում են նաեւ Կառավարության ծրագրին հավանություն տալու հարցը, ինչպես նաեւ Կառավարության կառուցվածքի փոփոխության վերաբերյալ օրենքի նախագծի քննարկումը, որով նախատեսվում է կրճատել նախարարությունների թիվը՝ 17-ից դարձնելով 12:
Հիշեցնենք, որ ԱԺ առաջին նստաշրջանն ավարտվում է Ազգային ժողովի նախագահի եզրափակիչ ելույթով եւ հերթական նստաշրջանի գումարման օրվա մասին հայտարարությամբ:
Այս խորհրդարանն ունի 132 պատգամավոր եւ երեք խմբակցություն, իսկ նախորդ ԱԺ-ն ուներ 105 պատգամավոր եւ 4 խմբակցություն: «Իմ քայլը» դաշինքն ունի 88 պատգամավոր, ԲՀԿ-ն՝ 26 եւ «Լուսավոր Հայաստանը»՝ 18 պատգամավոր:
Սահմանադրության 149-րդ հոդվածի համաձայն Ազգային ժողովը վարչապետ չի ընտրելու, այլ «ՀՀ նախագահը խորհրդարանի ձեւավորումից անմիջապես հետո անհապաղ վարչապետ է նշանակում խորհրդարանական մեծամասնության ներկայացրած թեկնածուին», իսկ կառավարությունը կազմավորվում է վարչապետի նշանակումից հետո 15-օրյա ժամկետում:
