Այն, որ ԱԺ-ում երկու հանձնաժողովների նախագահները եւ ԱԺ փոխնախագահի պաշտոնը բաժին է հասել ԲՀԿ-ին, դա «Իմ քայլը» դաշինքի սիմպատիայով կամ անտիսիմպատիայով չէ պայմանավորված: Այս մասին, այսօր՝ հունվարի 16-ին, ԱԺ-ում լրագրողների հետ զրույցում նշեց ԲՀԿ խմբակցության պատգամավոր Նաիրա Զոհրաբյանը:
Նա նշեց, որ դա պայմանավորված է օրենսդրական կարգավորումներով, քանի որ ԱԺ հանձնաժողովները բաշխվում են Դոնթի բանաձեւով. «Նաեւ Սահմանադրությունը հստակ արձանագրում է, որ ԱԺ երեք փոխնախագահներից մեկը անպայման պետք է լինի ընդդիմությունից: Տվյալ դեպքում՝ Սահմանադրությունը չի պարտադրում, որ այդ պաշտոնը տրվում է ամենամեծ խմբակցությանը, բայց քաղաքական իրողությունն այն է, որ պիտի անպայմանորեն հաշվի առնել ժողովրդի ձայնը: Այսինքն սա «Իմ քայլի» կողմից բարեգործական ժեստ կամ ակցիա չէ: Սա հստակ օրենք է, որը կարգավորվում է Սահմանադրությամբ եւ օրենքներով»: