Կառավարությունն իր այսօրվա՝ հունվարի 17-ի որոշմամբ հավանություն տվեց ՀՀ Կառավարության, Արմփաուեր ՓԲԸ-ի եւ Ռենկո Ս․Պ․Ա-ի միջեւ կնքված Շրջանակային Համաձայնագրին:
Հարցը ներկայացրեց արդարադատության նախարարի պաշտոնակատար Արտակ Զեյնալյանը, ով նշեց, որ այս որոշման անհրաժեշտությունը պայմանավորված է ծրագրի ֆինանսավորումը կառուցապատողին հասանելի դառնալու համար, հետեւաբար ծրագրի փաստացի գործընթացն սկսելու հրատապությամբ:
Նշվում է, որ 2015թ. դեկտեմբերի 2-ին ՀՀ Կառավարության եւ Renco SpA ընկերության միջեւ կնքվել է Փոխըմբռնման Հուշագիր Երեւան քաղաքի տարածքում՝ «Երեւանի ՋԷԿ» ՓԲԸ ի գործող ՋԷԿ-ի հարեւանությամբ, գազային վառելիքով աշխատող կոմբինացված ցիկլով 250ՄՎտ հզորությամբ նոր էլեկտրակայան կառուցելու եւ շահագործելու վերաբերյալ: Հիմք ընդունելով նշված Հուշագիրը՝ 2017թ. ապրիլի 27-ին ՀՀ Կառավարության, Renco SpA-ի եւ Արմփաուեր ՓԲԸ-ի («Կառուցապատող») կնքվել է Ծրագրի վերաբերյալ Շրջանակային Համաձայնագիր:
Զեյնալյանի խոսքով, այս պայմանագիրը ստորագրվելուց հետո ֆինանսավորումը հասանելի կդառնա կառուցապատողին եւ այն կսկսի 250 մգվ հզորությամբ ՋԷԿ-ի շինարարությունը:
Իր հերթին էներգետիկ ենթակառուցվածքների, բնական պաշարների նախարարի պաշտոնակատար գարեգին Բաղրամյանը նշեց, որ այս պայմանագրով Հայաստանի շահերը պաշտպանված են. «Տարեկան մինչեւ 6,4 մլն դոլարի խնայողություն ունեցանք մեր էներգետիկ համակարգի համար: Եթե նայենք 20-25 տարվա կտրվածքով, շուրջ 160 մլն դոլար պետությունը կշահի: Ընկերությունն արդեն համապատասխան ֆինանսական երաշխիքներ է ներկայացրել բանկին եւ դիմել է կառուցման եւ արտադրության լիցենզիա ստանալու համար Հանրային ծառայությունները կարգավորող հանձնաժողովին»,-ասաց նա՝ հավելելով, որ աշխատանքներն սկսելուն պես կստեղծվի շուրջ 1200 աշխատատեղ:
Նախարարի պաշտոնակատարի խոսքով, երբ կայանը պատրաստ լինի եւս 230-250 աշխատատեղ կստեղծվի շատ բարձր աշխատավարձով:
Նշենք, որ Ծրագրի իրականացման վրա կներդրվի 250 մլն դոլար։ Շինարարությունը կտեւի մոտ 26 ամիս, որում կներգրավվի 1000-1200 մարդ։ Կայանի շահագործման ժամանակ կստեղծվի մոտ 200-230 բարձր վարձատրությամբ աշխատատեղ, որոնցից 50-70 արդեն Կայանի շինարարության ընթացքում կգործուղվեն Գերմանիա՝ Siеmens ընկերությունում համապատասխան վերապատրաստում անցնելու եւ որակավորում ստանալու համար։