Վաղուց հասունացել է շփման գծում պաշտպանության կառուցվածքի փոփոխության անհրաժեշտությունը՝ սկսած պաշտպանության գծի ինժեներական համակարգից: Հունվարի 17-ին ԱԺ նիստում Պաշտպանության եւ անվտանգության հարցերով խորհրդարանական մշտական հանձնաժողովի ղեկավարի պաշտոնի թեկնածության քննարկման ժամանակ այս մասին ասաց այդ պաշտոնի թեկնածու, «Իմ քայլը» դաշինքի պատգամավոր Անդրանիկ Քոչարյանը՝ պատասխանելով «Բարգավաճ Հայաստան» կուսակցության խմբակցության քարտուղար Արման Աբովյանի հարցին, որը հետաքրքրվել էր, թե կարելի՞ է արդյոք սահմանին պատանի ժամկետայիններին փոխարինել ավելի փորձառու պայմանագրային զինծառայողներով:
Քոչարյանի խոսքով՝ այս համակարգը ամրապնդման եւ վերադասավորումների առումով որոշ փոփոխության կարիք ունի: «Մենք պետք է փոխենք սահմանին ծառայության սկզբունքները եւ պայմանները: Ես այս մասին մշտապես հրապարակայնորեն ասել եմ: Ես այս մասին ասել եմ նաեւ իմ ընկերներին, եւ ընդդեմ արտահայտած միայն մի փաստարկ է եղել, որ այդ տեսակի բարեփոխումների անցկացման համար մենք ֆինանսական ռեսուրսներ չունենք: Բայց կարծում եմ, որ նման հնարավորություն կարելի է գտնել այս հարցը մեկ այլ՝ Տնտեսական հարցերով խորհրդարանական մշտական հանձնաժողովի հետ քննարկման ճանապարհով: Այդ բարեփոխումները թույլ կտան ապահովել նաեւ որոշ տնտեսական արդյունք»,- պարզաբանեց Անդրանիկ Քոչարյանը:
Ընդ որում՝ նա նշեց, որ եթե այս խնդիրը լուծվի, ապա կարելի է լուծել նաեւ ժողովրդագրության հարցը, ինչպես նաեւ բարձրացնել պայմանագրային զինծառայողների աշխատավարձերը, որոնք կարող են տեղերում պայմաններ ստեղծել իրենց ընտանիքների անդամների ապրելու համար: Իսկ սա, իր հերթին, կնպաստի սահմանամերձ շրջանների զարգացմանը:
