Նախորդ տարեվերջին ՀՀ Պաշտպանության նախարարությունը հայտարարեց, որ մտադիր է վերաբացել սպորտային վաշտերը, սակայն հարցն այն է, թե ինչպես եւ ինչ պայմաններում: Այս մասին հունվարի 17-ին Ազգային ժողովի նիստում, Պաշտպանության եւ անվտանգության հարցերով մշտական հանձնաժողովի նախագահի թեկնածության հարցով քննարկմանը հայտարարեց «Իմ քայլը» դաշինքի խորհրդարանական խմբակցության պատգամավոր Արսեն Ջուլֆալակյանը՝ դիմելով այդ պաշտոնում առաջադրված թեկնածու, իր կուսակից Անդրանիկ Քոչարյանին:
Ի պատասխան, Քոչարյանը հայտարարեց, որ տարիներ շարունակ պաշտպանության նախարարի առաջին տեղակալի պաշտոնում նա ոչ միայն զբաղվել է կադրային քաղաքականությամբ, այլ նաեւ կառուցվածքային փոփոխությունների հարցերով:
«Այն ժամանակ ես ընդգծեցի սպորտային վաշտեր ունենալու անհրաժեշտությունը, եւ հիմա նույն տեսակետին եմ: Պարզապես դրանց ծառայողական կարգապահությունը եւ սպորտային գործունեությունը պետք է ճիշտ ձեւով սահմանվեն: Ամեն ինչ պետք է հիմնված լինի այն բանի վրա, որ յուրաքանչյուր ոք պետք է ծառայի բանակում՝ լինի դա աշխարհի չեմպիոն, թե օլիմպիական չեմպիոն», -պարզաբանեց Քոչարյանը` հավելելով, որ սպորտային վաշտերի առկայությունը միայն կավելացնի բանակի հեղինակությունը:
