Հայաստանի Զինված ուժերի եւ նրա սպառազինության դիվերսիֆիկացիայի գործընթացը պետք է ընթանա հաշվի առնելով աշխարհի զարգացած բանակների փորձը: Հունվարի 17-ին ԱԺ նիստում Պաշտպանության եւ անվտանգության հարցերով խորհրդարանական մշտական հանձնաժողովի ղեկավարի պաշտոնի թեկնածության քննարկման ժամանակ այս մասին ասաց այդ պաշտոնի հավակնորդ, «Իմ քայլը» դաշինքի պատգամավոր Անդրանիկ Քոչարյանը:
Վարչապետ Նիկոլ Փաշինյանի դաշինքի պատգամավորը դժգոհեց, որ մինչ օրս հայկական կողմն օգտագործում է ռուսական զենքը, որն ինչ-որ իմաստով նախատեսում է ներգրավում ռուսական ռազմական մտածողության շրջանակի մեջ: «Սակայն մենք չենք կարող խուսափել դիվերսիֆիկացումից, մենք պետք է օգտագործենք համաշխարհային լավագույն փորձը՝ սկսած անօդաչու թռչող սարքերի կառավարումից եւ ավարտած ռոբոտների արտադրությամբ»,- շեշտեց Քոչարյանը:
Պատգամավորի կարծիքով՝ Հայաստանը պետք է ընդօրինակի պաշտպանության համակարգում մարդկային գործոնի նվազեցման արդիական միտումները՝ բնակչության անվտանգության մակարդակի բարձրացման եւ հնարավոր մարդկային զոհերի կրճատման նպատակով: «Իհարկե, սա ապագայի հարց է, բայց այսօր մենք պետք է ուժեղացնենք ճակատի գիծը, մեր սպառազինությունն արդյունավետորեն օգտագործենք, որում ռուսական զենքի տեսակարար կշիռը բավականին բարձր է: Մենք պետք է Ռուսաստանի հետ ռազմավարական հարաբերությունները զարգացնենք՝ դրա հետ միաժամանակ բաց չթողնելով այլ երկրների լավագույն փորձն օգտագործելու հնարավորությունը»,- ասաց նա:
Ընդ որում՝ Անդրանիկ Քոչարյանը հավելեց, որ ինքը՝ Ռուսաստանը շատ բան է ընդօրինակել ՆԱՏՕ-ի փորձից, եւ այսօրվա դրությամբ ռուսական բանակը ակտիվ զարգացման փուլում է, ինչի մասին են վկայում սպառազինություն ընդունած նոր տեխնիկական միջոցները: Այս համատեքստում պատգամավորը կարեւորեց նաեւ Հայաստանի պաշտապանական գերատեսչությունում ռազմական գիտության ձեռքբերումների օգտագործումը: