Եվրոպական խորհրդարանի պատգամավորները ափսոսանք են հայտնել Ադրբեջանում այլախոհության ճնշման կապակցությամբ: Այս մասին ասվում է հունվարի 17-ին Եվրախորհրդարանի պատգամավորների ընդունած բանաձեւում:
Եվրախորհրդարանի անդամները ադրբեջանցի հայտնի բլոգեր Մեհման Հուսեյնովի անհապաղ եւ անվերապահ ազատ արձակման կոչ են անում, որը երկու տարվա ազատազրկման է դատապարտվել ոստիկանության խոշտանգումների մասին բարձրաձայնելու եւ պաշտոնյաների քննադատության համար՝ բացահայտելով նրանց անբացատրելի հարստությունը:
Եվրոպական խորհրդարանը պահանջում է վերջ դնել Ադրբեջանում այլախոհության խիստ ճնշմանը եւ կոչ անում անհապաղ եւ անվերապահ ազատ արձակել բոլոր քաղբանտարկյալներին:
Պատգամավորները Ադրբեջանին հիշեցնում են Մարդու իրավունքների եվրոպական կոնվենցիայից բխող պարտավորությունների մասին եւ երկրի իշխանություններին կոչ անում հարգել եւ կատարել Մարդու իրավունքների եվրոպական դատարանի որոշումները:
533 կողմ, 28 դեմ եւ 36 ձեռնպահ ձայներով ընդունված բանաձեւը վերահաստատում է ԵՄ-ի եւ Ադրբեջանի միջեւ քննարկվող նոր համաձայնագրի կարեւորությունը` ընդգծելով, որ ժողովրդավարական բարեփոխումները, օրենքի գերակայությունը եւ մարդու իրավունքների հարգումը պետք է պայմանագրի հիմքում լինեն:
Փաստաթղթում ընդգծվում է, որ Եվրախորհրդարանը ուշադիր հետեւելու է բանակցությունների ընթացքում երկրում տիրող իրավիճակին, նախքան պայմանագրի համար իր համաձայնություն տալը: