ՀՀ նախկին փոխվարչապետ Արմեն Գեւորգյանը ՀՀ գործող իշխանությունների հետ որեւէ քննարկում չի ունեցել։ Այս մասին այսօր՝ հունվարի 17–ին Վերաքննիչ քրեական դատարանում հայտարարեց նախկին պաշտոնյան՝ պատասխանելով այն հարցին, թե արդյոք նոր կառավարությանը «ոչ» ասելու առիթ ունեցե՞լ է։
Անդրադառնալով իր հարցազրույցներից մեկում հնչեցրած այն մտքին, թե իր անվան հետ կապված վերջին ամիսներին տարածված «լեգենդների» պատճառներից մեկն այն է, որ ինքը երկար տարիներ պետական համակարգում ազդեցիկ պաշտոններ զբաղեցնելով, հաճախ ասել է «ոչ», Գեւորգյանը պատասխանեց.
«Այո, ես ոչ եմ ասել համայնքների ղեկավարներին, որոնք եկել են տարբեր առաջարկություններով, ես ոչ եմ ասել տարբեր պաշտոնյաների, որոնք ցանկացել են այս կամ այն ծրագիրն իրականացնել։ Սակայն նմանատիպ գործնական քննարկումներ կամ այլ քննարկումներ այսօրվա գործող կառավարության հետ չեմ ունեցել»,–ասաց նա։
Հիշեցնենք, որ Արմեն Գեւորգյանը մեղադրվում է Մարտի 1-ի գործով արդարադատության կայացմանը խոչընդոտելու, առանձնապես խոշոր չափերի կաշառք ստանալու, փողերի լվացման եւ սահմանադրական կարգի տապալմանը օժանդակելու համար։
