ԱՄՆ արդարադատության նախարարությունն ու ՀԴԲ-ն հրաժարվում են մեկնաբանել իրանական Press TV հեռուստաալիքի հաղորդավարի ձերբակալությունը, փոխանցում է CBS News-ը:
Մարզի Հաշեմիին ՀԴԲ-ն կալանավորել է կիրակի ԱՄՆ այցելության ժամանակ: Նրա որդին հայտնել է, որ նրան բանտում են պահում, ըստ երեւույթին՝ վկայի կարգավիճակում:
Հաշեմիին ձերբակալել են Սենթ Լուիսում, որտեղ նա Նոր Օռլեանի շրջանում ազգականներին այցելելուց հետո փաստագրական նկարահանում էր կատարում: Նրան այնուհետեւ տեղափոխել են Վաշինգթոն, ասել է նրա ավագ որդի Հոսեյն Հաշեմին:
ՀԴԲ-ն եւ արդարադատության նախարարությունը հրաժարվել են գործը մեկնաբանել:
Հաշեմին արդեն 25 տարի աշխատում է իրանական պետական հեռուստատեսային ցանցում:
Հոսեյն Հաշեմին Associated Press-ին ասել է, որ մայրը Թեհրանում է ապրում եւ ԱՄՆ է գալիս տարեկան գրեթե մեկ անգամ՝ ընտանիքին հյուրընկալվելու:
«Մենք մինչեւ հիմա չգիտենք, թե ինչ է տեղի ունենում»,- ասել է Հոսեյն Հաշեմին, որը Կոլորադոյի համալսարանում գիտաշխատող է: Նա նաեւ ասել է, որ ինքն ու իր եղբայրները եւ քույրերը դատարան են կանչվել:
ԱՄՆ դաշնային օրենքը դատավորներին թույլ է տալիս վկաներին կալանավորել եւ ձերբակալել, եթե կառավարությունը կարողանա ապացուցել, որ նրանց ցուցմունքները քրեական գործի համար բացառիկ արժեք ունեն, եւ որ նրանք կարող են փախուստի դիմել կամ դատարանի ծանուցագրին չարձագանքել: Սակայն, որպես կանոն, օրենքը պահանջում է, որ ցուցմունք տալուց հետո վկաներն անմիջապես ազատվեն:
Հաշեմիի ընտանիքը փորձում է փաստաբան վարձել, բայց դա դժվար է, քանի որ նրան չեն մեղադրել հանցագործության կատարման մեջ:
Նրա որդու խոսքով՝ Հաշեմին ԱՄՆ քաղաքացի է, մինչեւ իր ձերբակալությունը ՀԴԲ-ին չի առնչվել:
Նշենք, որ Իրանը քննադատել է Հաշեմիի ձերբակալությունը՝ ԱՄՆ-ին անվանելով լրագրողների համար վտանգավոր երկիր եւ կոչ անելով լրագրողին անհապաղ ազատ արձակել: