Ամերիկյան ավտոարտադրող Tesla-ն չինական շուկայից հետ կկանչի ընդհանուր 14123 մեքենա՝ անվտանգության բարձիկների պատճառով, որոնց մեջ, ինչպես պարզվել է, պարունակվում են որոշ տարրեր, որոնք արտադրել է սնանկացած ճապոնական Takata ընկերությունը, հայտնում է «ՌԻԱ Նովոստի»-ն՝ վկայակոչելով Չինաստանի շուկայի կարգավորման հարցերով պետական վարչության կայքը:
Հետ կկանչվեն Tesla Model S ավտոմեքենաները, որոնք արտադրվել են 2014 թվականի փետրվարի 4-ից 2016 թվականի դեկտեմբերի 9-ը: Հետկանչը կսկսվի ապրիլի 4-ից:
Վարչության հայտարարության մեջ նշված է, որ ավտոմեքենաների նշված խմբաքանակներում ուղեւորի կողմի անվտանգության բարձիկները, որոնք Takata-ի գազագեներատորներով արտադրվել են ամոնիումի նիտրատի հիման վրա առանց չորացուցիչի, կտորների պայթելու եւ ավտոմեքենայի մեջ գտնվողներին վնասվածքներ հասցնելու մեծ հավանականություն ունեն: Tesla-ն մտադիր է անվտանգության բոլոր բարձիկները փոխարինել: