Սահմանադրությամբ Կենտրոնական բանկին տրված են որոշակի լիազորություններ ինֆլյացիայի զսպման հարցում եւ այլն: Հունվարի 18-ին Ազգային ժողովի նիստում այս մասին ասաց Ֆինանսավարկային եւ բյուջետային հարցերով խորհրդարանական մշտական հանձնաժողովի նախագահի թեկնածու, աշխատանքի եւ սոցիալական հարցերի նախկին նախարար, «Լուսավոր Հայաստան» կուսակցությունից պատգամավոր Մանե Թանդիլյանը՝ պատասխանելով «Իմ քայլը» դաշինքից պատգամավոր Բաբկեն Թունյանի հարցին:
Թանդիլյանի կարծիքով՝ այդ իմաստով ԿԲ-ն կառույց է, որը կարող է բավականին ազատ գործել, ինչը միանգամայն դրական է: «Բայց միեւնույն ժամանակ մենք պետք է հասկանանք, որ ԿԲ-ի վարած ֆինանսավարկային քաղաքականությունը լրջագույն հետեւանքների է հանգեցնում, հետեւաբար՝ Ազգային ժողովը նրա հետ աշխատելու իրավասություն ունի՝ օգտագործելով վերահսկման մեխանիզմները»,- հավելեց նա:
Պատգամավորը համոզված է, որ այս բոլոր հարցերի լուծման համար անհրաժեշտ է անցկացնել համապատասխան քննարկումներ՝ փորձագետների եւ բոլոր շահագրգիռ անձանց ներգրավմամբ: Մանե Թանդիլյանի կարծիքով՝ ԿԲ-ն պետք է հաշվետու լինի ժողովրդին՝ ի դեմս խորհրդարանի: «Այն ազատությունները, որոնք տրված են ԿԲ-ին, պետք է ուղղված լինեն մեր ֆինանսական համակարգի ամրապնդմանն ու զարգացմանը»,- եզրափակեց նախկին նախարարը: