ՄԱԿ գլխավոր քարտուղար Անտոնիու Գուտերեշը ողջունում է Ադրբեջանի ԱԳ նախարար Էլմար Մամեդյարովի եւ Հայաստանի ԱԳ նախարարի պաշտոնակատար Զոհրաբ Մնացականյանի միջեւ կայացած հանդիպումը, որը տեղի է ունեցել հունվարի 16-ին Փարիզում՝ ԵԱՀԿ Մինսկի խմբի համանախագահների հովանու ներքո: Այս մասին նշված է ՄԱԿ գլխավոր քարտուղարի մամուլի քարտուղարի հայտարարության մեջ:
Գուտերեշը բարձր է գնահատում կողմերի անփոփոխ հանձնառությունը Լեռնային Ղարաբաղի ձգձգված հակամարտության կարգավորման համար համաձայնեցված եւ խաղաղ լուծման որոնմանը, եւ մասնավորապես ողջունում է նախարարների համաձայնությունը բնակչությանը խաղաղությանը նախապատրաստելու համար կոնկրետ միջոցների ընդունման անհրաժեշտության մասին:
ՄԱԿ գլխավոր քարտուղարը կրկին հայտարարում է ԵԱՀԿ Մինսկի խմբի կարեւոր միջնորդական ջանքերին ՄԱԿ լիակատար աջակցության մասին: