Այսուհետ վերահսկողությունը Ազգային ժողովի ամենակարեւոր գործառույթներից մեկը կդառնա: Հունվարի 18-ին Ազգային ժողովի նիստում այս մասին ասաց Ֆինանսավարկային եւ բյուջետային հարցերով խորհրդարանական մշտական հանձնաժողովի նախագահի թեկնածու, աշխատանքի եւ սոցիալական հարցերի նախկին նախարար, «Լուսավոր Հայաստան» կուսակցությունից պատգամավոր Մանե Թանդիլյանը:
Նրա խոսքով՝ արդյունավետ եւ որակյալ վերահսկողության շնորհիվ նրանք, որպես իշխանության ճյուղերից մեկը, կկարողանան հավասարակշռել գործադիր մարմնի աշխատանքը:
«Խորհրդարանի կողմից վստահության արժանանալու դեպքում ես պատրաստվում եմ մեր հանձնաժողովը բացառիկ վերահսկող մարմին դարձնել, որը թույլ կտա Ազգային ժողովին լիարժեք կատարել իր պարտականությունները: Դրա միջոցով մենք պետք է վերահսկենք օրենքների կիրարկումը: Հանձնաժողովի գործառույթների մեջ է մտնում նաեւ բյուջետային գործընթացների վերահսկողությունը: Այս օրվանից մենք պետք է ստուգենք պետական միջոցների ծախսերի արդյունավետությունը», - պարզաբանեց պատգամավորը:
Նա նաեւ մեծ նշանակություն է տալիս Աուդիտորական պալատի դերի նշանակությանը: Ըստ Թանդիլյանի՝ իր համար շատ կարեւոր է Աուդիտորական պալատի անկախությունը:
