Ոչ մի փաստաթուղթ կամ որոշում, որն ընդունվել կամ ստորագրվել է առանց Արցախի մասնակցության, չի կարող լեգիտիմ լինել: Հունվարի 18-ին լրագրողների հետ հանդիպմանն այս մասին ասաց իրավապաշտպան, Հայաստանի առաջին օմբուդսմեն Լարիսա Ալավերդյանը:
Մեկնաբանելով Հայաստանի եւ Ադրբեջանի արտգործանախարարների հանդիպումը՝ նա նշեց, որ դա ոչ ավելին է քան հանդիպում կամ բանակցային գործընթացի նախապատարստում, բայց ոչ ինքնին գործընթաց:
«Կարո՞ղ են արդյոք Հայաստանը եւ Ադրբեջանը խնդիրներ քննարկել: Այո: Բայց երկու ղեկավարների ստորագրած որոշումները, իրավական իմաստով ոչինչ են: Ցանկացած փաստաթուղթ կամ որոշում, որը կստորագրեն երկու ղեկավարները, օրինական չեն: Հայաստանն ընդամենը Արցախի անվտանգության երաշխավորն է», - ընդգծեց Լարիսա Ալավերդյանը:
Նրա խոսքով՝ Հայաստանի իշխանությունները երբեք միջազգային հանրությանը Արցախի ստեղծման լեգիտիմության իրավական հիմքը չեն ներկայացրել: Դա եղել է միայն մեկ անգամ եւ Արցախի նախաձեռնությամբ:
«Գործընթացը ներկայիս հունի մեջ է մտել դեռ առաջին նախագահի ժամանակ եւ չի կարող դրանից դուրս գալ: Հայաստանը ոչ միայն որոշ փաստաթղթեր է ստորագրել, որոնք հաստատում են այն ժամանակվա ղեկավարության մոտեցումները, որ Արցախը կարող է լինել ՀՀ կազմում, միայն ինքնավարության կարգավիճակով: Նոր իշխանությունները պարտավոր են գործընթացը դուրս բերել այս վիճակից», - եզրափակեց Ալավերդյանը: