«Գազպրոմ Արմենիա» ՓԲԸ-ն ներտնային սպասարկման ոլորտում ապօրինի գործունեություն է վարում: Հունվարի 18-ին լրագրողների հետ հանդիպման ժամանակ այս մասին ասաց սեփականատեր եւ «Էկոնոմ գազ սերվիս» ԲԲԸ տնօրեն Դանիել Զաքարյանը:
Նրա խոսքով՝ սպառողները ստանում են գազամատակարարման դադարեցման սպառնալիքներ, եթե որոշեն օգտվել ընկերության ծառայություններից, որը չի համագործակցում «Գազպրոմ Արմենիայի» հետ: «Ընկերության մենմաշնորհը սահմանափակվում է մինչեւ բնակելի տներ գազամատակարարմամբ: Ինչ վերաբերում է ներտնային սպասարկմանը, ապա, ըստ օրենքի, այդ շուկան ազատ է, եւ ծառայություններ կարող են մատուցել տարբեր ընկերություններ»,- պարզաբանեց նա:
Զաքարյանը հավելեց, որ հակասությունները ծագում են Հանրային ծառայությունները կարգավորող հանձնաժողովի որոշումից, որի համաձայն՝ ներտնային սպասարկում իրականացնող ընկերությանը ընտրում է «Գազպրոմ Արմենիան»: «Եվ «Գազպրոմ Արմենիան» արհեստական խոչընդոտներ է ստեղծում, որպեսզի շուկայում գործի միայն մեկ ընկերություն՝ «ԷՅ-Ի-ՋԻ ՍԵՐՎԻՍ»-ը»,- շեշտեց ձեռնարկատերը:
Դանիել Զաքարյանը հայտնեց, որ իրենց ընկերությունն արդեն դիմել է համապատասխան մարմիններին, բայց բնակչությունը, ում սպառնում են գազի անջատմամբ, պասիվ է եւ ոչինչ չի ձեռնարկում իր իրավունքների պաշտպանության համար: «Սպառողները պետք է հասկանան, որ ոչ ոք չի կարող իրենց հարկադրել համագործակցել այս կամ այն սպասարկող ընկերության հետ»,- եզրափակեց նա:
