Իրանի դեմ ճնշող արշավում Եվրոպայի աջակցությունը ստանալու ԱՄՆ-ի փորձերը անհաջողության են մատնվել, երբ պաշտոնական անձինք հայտարարել են, որ մի շարք ԵՄ երկրների նախարարներն, ամենայն հավանականությամբ, չեն մասնակցի Իրանի եւ Մերձավոր Արեւելքի հարցով ԱՄՆ-ի կազմակերպած համաժողովին, գրում է The Wall Street Journal-ը:
Համաժողովի մասին, որը պետք է Վարշավայում անցկացվի, ասել է ԱՄՆ պետքարտուղար Մայք Պոմպեոն անցյալ շաբաթ Մերձավոր Արեւելքով շրջագայության ժամանակ:
Պոմպեոն նշել է, որ հանդիպումը տասնյակ երկրներ կհավաքի՝ Մերձավոր Արեւելքում կայունության վրա կենտրոնանալու համար եւ սա իր մեջ կարեւոր տարր է պարունակում՝ ապահովել, որ Իրանը ապակառուցողական ազդեցություն չդրսեւորի:
Որոշ եվրոպացի դիվանագետներ ԵՄ անդամ Լեհաստանի ընտրությունը՝ որպես համաժողովի կազմակերպիչներից մեկի, ԵՄ-ն Իրանի հարցով պառակտելու փորձ են գնահատել:
ԵՄ-ն իրանական միջուկային համաձայնագրի կողմնակիցներից է եւ ձգտում է օգնել պահպանել Թեհրանի հետ տնտեսական կապերը՝ չնայած համաձայանգրից դուրս գալու Թրամփի որոշումից հետո Իրանի դեմ ԱՄՆ-ի վերսկսված պատժամիջոցներին:
ԵՄ բարձրաստիճան պաշտոնյան հայտնել է, որ ԵՄ արտաքին գործերի նախարար Ֆեդերիկա Մոգերինին չի մասնակցի Վարշավայում կայանալիք համաժողովին: Մոգերինին գլխավորում է 2015 թ համաձայնագրի պահպանման ուղղությամբ ԵՄ-ի ջանքերը:
Նրա խոսքով՝ ԵՄ-ին անհասկանալի է, թե փետրվարի 13-14-ին Մերձավոր Արեւելքում խաղաղության եւ կայունության ինչ տեսլական կներկայացվի:
Եվրոպացի դիվանագետները հայտարարել են, որ Ֆրանսիան հազիվ թե իր արտգործնախարարին ուղարկի: Մեծ Բրիտանիան եւ Գերմանիան չեն որոշել, թե ով կներկայացնի իրենց: Լյուքսեմբուրգի արտգործնախարարն ասել է, որ բաց կթողնի միջոցառումը:
Եվրոպացի դիվանագետներից մեկը հայտնել է, որ ԵՄ-ն հակաիրանական կոալիցիայի մեջ չի մտնի:
Վերջին ամիսներին ԱՄՆ պաշտոնյաները խիստ նվազեցնում էին Իրանի հարցով Եվրամիության եւ ԱՄՆ-ի միջեւ տարաձայնությունները՝ ասելով, որ երկու կողմերն էլ նույն մտահոգություններն ունեն եւ միասին աշխատում են Թեհրանի սպառնալիքը թեթեւացնելու համար:
Սակայն եվրոպական դիվանագետների խոսքով, զգալի տարաձայնությունները եւ լարվածությունը շարունակվում են, ներառյալ նոր ֆինանսական մեխանիզմի ստեղծմանն ուղղված ԵՄ ջանքերը, որը թույլ կտա եվրոպական ընկերություններին խուսափել ԱՄՆ-ի պատժամիջոցներից Իրանի հետ առեւտուր անելու դեպքում:
Ըստ ԵՄ դիվանագետների, մեխանիզմը, հավանաբար, Ֆրանսիայում մոտակա շաբաթներին կհաստատվի, իսկ բարձրաստիճան գերմանացի բանկիրը կնշանակվի գործադիր տնօրեն: Ըստ դիվանագետների, Մեծ Բրիտանիան կմիանա Ֆրանսիային եւ Գերմանիային որպես այդ մեխանիզմի բաժնետեր:
Նոյեմբերին ԱՄՆ Պետքարտուղար Սթիվեն Մնուչինը նախազգուշացրել էր, որ ԱՄՆ-ն կարող է պատժամիջոցներ կիրառել եվրոպական ֆինանսական մեխանիզմի դեմ: