Հունվարի 17-ին ԵԱՀԿ-ում Հայաստանի առաքելության ղեկավար, դեսպան Արմեն Պապիկյանը հանդիպեց ԵԱՀԿ Գլխավոր քարտուղար Թոմաս Գրեմինգերին։

ԱԳՆ-ից NEWS.am-ին հայտնում են, որ Թոմաս Գրեմինգերը, շնորհավորելով Արմեն Պապիկյանին ԵԱՀԿ-ում Հայաստանի առաքելության ղեկավարի պաշտոնը ստանձնելու կապակցությամբ, վստահություն հայտնեց, որ դեսպան Պապիկյանի անցած ուղին լավագույնս կնպաստի ձեւավորված համագործակցության վերընթաց զարգացմանը։ Բարձր գնահատելով Հայաստանում տեղի ունեցած վերջին ներքաղաքական զարգացումները՝ Թոմաս Գրեմինգերը պատրաստակամություն հայտնեց շարունակել աջակցությունը Հայաստանին հետագա բարեփոխումների գործընթացում։

Շնորհակալություն հայտնելով Թոմաս Գրեմինգերին ջերմ ընդունելության եւ բարեմաղթանքների համար՝ դեսպան Պապիկյանը հավաստիացրեց ԵԱՀԿ Գլխավոր քարտուղարին, որ Հայաստանը հետայսու եւս կշարունակի իր կառուցողական ներգրավվածությունը ԵԱՀԿ բոլոր մարմիններում։

Հանդիպման ընթացքում զրուցակիցները մտքեր փոխանակեցին ԵԱՀԿ օրակարգային հարցերի լայն շրջանակի շուրջ։