ԱՄՆ Հայ Դատի հանձնախմբի գործադիր տնօրեն Արամ Համբարյանն իր ֆեյսբուքյան էջում արձագանքել է հունվարի 16-ին Փարիզում ՀՀ արտգործնախարարի ժամանակավոր պաշտոնակատար Զոհրաբ Մնացականյանի ու Ադրբեջանի արտգործնախարար Էլմար Մամեդյարովի միջև տեղի ունեցած հանդիպումից հետո ԵԱՀԿ Մինսկի խմբի համանախագահների այն հայտարարությանը, թե «Հայաստանի և Ադրբեջանի ԱԳ նախարարները «համաձայնել են այն հարցում, որ հարկավոր է հստակ քայլեր ձեռնարկել երկու ժողովուրդներին խաղաղության նախապատրաստելու համար»:
«Յուրաքանչյուրն էլ «խաղաղություն» է ուզում։ Շատ պարզ է։ Սակայն սատանան մանրուքների մեջ է, որոնք արժե ուսումնասիրել հիմա, քանի դեռ Արցախի կորստին դանդաղորեն հանգեցրած լավ մտադրությունների և քաղաքավարի դիվանագիտության պատճառով դառը ափսոսանքով հետ չենք նայել»,– գրել է նա:
Նրա խոսքով՝ սեղանին դրված համաձայնությունը, որը հայտնի է որպես «Մադրիդյան սկզբունքներ»,կոչ է անում ավանսով, ռազմավարական, տարածքային և անդառնալի զիջումների գնալ Ադրբեջանի հետաձգված, անորոշ և շրջելի խոստումների դիմաց, այսինքն` հող` փաստաթղթի դիմաց:
«Հանուն «խաղաղության»` այս գործարքին աջակցելը հայերից կպահանջի հրաժարվել ոչ միայն գիտակցությունից, այլև ինքնապահպանական բնազդից`
1) ենթադրել, թե Արցախի այս հսկայական տարածքների հանձնումը ինչ-որ կերպ Արցախը կդարձնի ավելի ապահով կամ Ադրբեջանը` նվազ ագրեսիվ,
2) համարել, որ Արցախի կողմից ուղղակի զիջումներին կհաջորդի այն քայլը, որ Ադրբեջանը կհրաժարվի Արցախի ինքնիշխանության դեմ իր նկրտումներից,
3) հավատալ, որ եթե Ադրբեջանը վերականգնի Արցախի «ինքնավարությունը» (խորհրդային դարաշրջանի ոճով), դա կհանգեցնի խաղաղ և կայուն համակեցության,
4) հավատալ, որ Արցախի շուրջ տեղակայված միջազգային խաղաղապահները իսկապես կվտանգեն իրենց կյանքը` կանխելու ադրբեջանական նոր հարձակումները,
5) հավատալ, որ արդարացի կլինի պատասխանատվություն ստանձնել Արցախի ռազմավարական զիջումների համար, այն դեպքում, երբ Ադրբեջանը հետաձգում է իր անորոշ (կամ հաճախ փոփոխվող) խոստումների իրականացումը,
6) ենթադրել, որ Արցախը պետք է միջազգային համաձայնագրի առարկա լինի` առանց նրա լիիրավ մասնակցության»,– գրել է նա։