«Սոյուզմուլտֆիլմը» կարող է Կառլսոնի մասին սերիալ նկարահանել։ Այս մասին RNS գործակալությանը հայտնել է կինոստուդիայի կառավարման նախագահ Յուլիանա Սլաշչեւան։ Գրող Աստրիդ Լինդգրենի ժառանգների հետ բանակցությունները մտել են ավարտական փուլ։
«Հանդիպումը կայացել է Սթոքհոլմում, ուր շվեդական կողմի հրավերով ժամանել են ստուդիայի ներկայացուցիչները»,- նշել է Սլաշչեւան։ Սպասվում է, որ իսկական սերիալ կնկարահանվի, քանի որ «Սոյուզմուլտֆիլմը» 1968թ․ եւ 1970թ․ նկարահանել է ընդամենը երկու մաս՝ «Փոքրիկը եւ Կառլսոնը» եւ «Կառլսոնը վերադարձել է»։ Մուլտֆիլմը սիրվեց առաջին հերթին այն պատճառով, որ Կառլսոնը խոսում է անզուգական Վասիլի Լիվանովի, իսկ Ֆրեկեն Բոկը նույնքան անզուգական Ֆաինա Ռանեւսկայայի ձայնով։
Աստրիդ Լինդգրենի ժառանգների հետ բանակցելն այնքան էլ հեշտ չէ։ Օրինակ, մինչ այժմ ամբողջ Շվեդիայում Կառլսոնի տեսքով փափուկ խաղալիք չեք գտնի։ Եւ դա այն պատճառով, որ ժառանգներն արգելել են կոմերցիոն նպատակներով օգտագործել Կառլսոնի նկարված (գրքերի նկարազարդումները կատարել է շվեդ նկարչուհի Իլոն Վիկլանդը) կերպարը։
