Հռոմի Կաթոլիկ եկեղեցու հովվապետը սկսել է Աղոթքների շաբաթը րքիստոնեական միասնության համար։ Ինչպես տեղեկացնում է ANSA գործակալությունը, Հռոմի պապը գլխավորել է երեկոյան ժամերգությունը Սուրբ Պողոսի մայր տաճարում, որով էլ տրվել է նախաձեռնության մեկնարկը, հաղորդում է ՏԱՍՍ-ը։
«Երբ հասարակությունն այլեւս հիմնված չէ համերաշխության եւ ընդհանուր բարիքի սկզբունքի վրա, մենք տեսնում ենք երկնաքերերի, շքեղ հյուրանոցների, հսկայական առեւտրային կենտրոնների՝ հարստության խորհրդանիշների կողքին հոգեւոր աղքատության մեջ ապրող մարդկանց։ Բայց եթե հարստությունն ընդհանուր չէ, հասարակությունը պառակտված է։ Համերաշխությունը եւ ընդհանուր պատասխանատվությունը պետք է օրենք լինեն, որոնց վրա է հաստատվում քրիստոնեական ընտանիքը»,- հովվապետի խոսքերը մեջբերում է գործակալությունը։
Ինչպես Vatican News պորտալին տված հարցազրույցում նշել է քրիստոնեական միասնության աջակցության գծով պապական խորհրդի ղեկավար, կարդինալ Կուրտ Կոխը, Ֆրանցիսկոս պապի համար էկումենիզմը չափազանց կարեւոր է եւ հենվում է երրորդության վրա. «Պապն ասում է. շարժվենք միասին, աղոթենք միասին, համագործակցենք միմյանց հետ. սրանք են երեք հիմնական տարրերը, քանի որ միասնության անհնար է հասնել առանց այս երեք բաղկացուցիչների։ Եվ երկրորդ կարեւոր բանն արյան էկումենիզմն է, քանի որ այժմ հավատի համար հետապնդվողների 80%-ը քրիստոնյաներ են։ Հիմա քրիստոնյաներն ավելի շատ են ենթարկվում հալածանքների, քան առաջին դարերում, այդ բոլոր ժամանակակից նահատակների արյունը ոչ թե բաժանում է, այլ միավորում»,- ասել է կարդինալը։
«Սկսվում է Աղոթքների շաբաթը քրիստոնեական միասնության համար, մենք բոլորս պետք է աղոթենք Աստծուն՝ տալու մեզ այդ մեծ շնորհը»,- Թվիթերում գրել է Ֆրանցիսկոս պապը։