Հրշեջ հաշվարկները կարողացել են մարել Մեքսիկայի Իդալգո նահանգի Թլաուելիլպան շրջանում խողովակատարի պայթյունից առաջացած հրդեհը։ Այս մասին շաբաթ օրն իր Թվիթերում տեղեկացնում է նահանգապետ Օմար Ֆայադը, հաղորդում է ՏԱՍՍ-ը։
«Թլաուելիլպանի հրդեհը մարված է,- ասվում է գրառման մեջ։- Մենք ցուցաբերում ենք անհրաժեշտ ողջ օգնությունը վիրավորներին ու տուժած ընտանիքներին»։
Պայթյունը եւ հրդեհը տեղի էին ունեցել խողովակատարի անլեգալ կտրման վայրում այն պահին, երբ այնտեղ էին գտնվում վառելիք հավաքող բազմաթիվ մարդիկ։ Վերջին պաշտոնական տվյալների համաձայն՝ արտակարգ պատահարը խլել է 21 մարդու կյանք, եւս 71-ը տուժել է։
Ողբերգության հետ կապված՝ աշխատանքն է սկսել Արտակարգ իրավիճակների ազգային հանձնաժողովը։ Մեխիկոյի իշխանություններն Իդալգո են ուղարկել չորս ուղղաթիռ՝ բժիշկներով, տուժածներին օգնություն ցուցաբերելու համար։