Բալի հանգստավայրի իշխանությունները մտադիր են հարկ մտցնել արտասահմանյան զբոսաշրջիկների համար $10-ի չափով։ Ինչպես գրում է The Straits Times թերթը, այդ միջոցները կուղղվեն էկոլոգիական կարիքների բավարարմանն ու մշակութային ժառանգության պահպանմանը։
Համանուն նահանգի նահանգապետ Վայան Քոսթերայի խոսքով՝ համապատասխան օրինագիծը ներկայացվել է տեղի խորհրդարանի քննարկմանը անցած տարեվերջին։ Ինչպես սպասվում է, առաջիկայում այն կընդունվի։
Ներկայում քննարկվում են վճարման ձեւերը. կամ հարկը կներառեն տոմսերի, այդ թվում եւ ավիատոմսերի արժեքի մեջ, կամ էլ վճարումը կկատարվի անմիջապես տեղ հասնելուն պես. օդանավակայանում կամ նավահանգիստներում։ Վայան Քոսթերան ճշտել է, որ «հարկը մտցվում է միայն օտարերկրյա զբոսաշրջիկների համար, քանի որ նրանք գալիս են հանգստանալու, զվարճանալու»։ «Ինդոնեզացիների մեծ մասը գալիս է Բալի, որպեսզի այցելի հարազատներին կամ էլ մասնակցի գործնական համաժողովների»,- ասել է նահանգապետը։
Անցած տարի ոչ պակաս, քան 6 մլն օտարերկրացի է այցելել այս կղզի։ Այցելուների մեծ մասը Չինաստանի եւ Ավստրալիայի քաղաքացիներ են։ Նահանգի զբոսաշրջային վարչության տվյալներով՝ 2017թ. Ռուսաստանից զբոսաշրջիկների թիվը նախորդ տարվա համեմատ աճել է 41%-ով եւ հասել մոտ 95 հազարի, հաղորդում է ՏԱՍՍ-ը։
