Մինչ Ադրբեջանի իշխանություններն, ավանդույթի համաձայն, այս օրերին զբաղված են հայերի հանդեպ ատելություն հրահրելով՝ «հունվարի 20-ի ողբերգության տարելիցը» քարոզչահնարքի շրջանակում, Բաքվում, «Մեհսուլ» մարզադաշտում տեղի է ունենում ընդդիմության բազմամարդ հանրահավաք, որը կազմակերպել է Դեմոկրատական ուժերի ազգային խորհուրդը։
Բողոքի ցույցին՝ բլոգեր Մեհման Հուսեյնովին եւ բոլոր մյուս քաղբանտարկյալներին ազատ արձակելու պահանջով, մասնակցում են Ժողովրդական ճակատ, «Մուսավաթ» եւ «ՌԵԱԼ» կուսակցությունների ակտիվիստները։ Ինչպես տեղեկացնում է ադրբեջանական Turan գործակալությունը, ոստիկանությունը անվտանգության ուժեղացված միջոցներ է ձեռնարկում, եւ հանրահավաքի եկածներին ստիպում են անցնել երեք արգելափակ։ Սովորականի պես իշխանությունները արգելափակում են ինտերնետ հասանելիությունը հանրահավաքի անցկացման վայրում, որպեսզի թույլ չտան ուղիղ հեռարձակում սոցցանցում։
Հիշեցնենք, որ երկար տարիներ Ադրբեջանի իշխանությունները հունվարի 19-20-ին բնակչությանը ստիպում են նշել «հունվարի 20-ի ողբերգության» տարելիցը։ 1990թ. հունվարի 20-ի գիշերը Բաքու մտցվեցին Խորհրդային բանակի ստորաբաժանումներ՝ բնիկ հայ բնակչության ջարդերը կանգնեցնելու նպատակով, որոնք արդեն տեղի էին ունենում նաեւ քաղաքի ռուս բնակիչների հանդեպ։ Ադրբեջանում հայկական ջարդերի կազմակերպիչներն ու մասնակիցները հայտարարվել են «հայրենիքի տարածքային ամբողջականության եւ անկախության մարտիկներ»։ Նրանք, ովքեր զոհվել են զորքեր մտցնելիս, թաղված են «շահիդների ծառուղում», ուր ամեն տարի զանգվածաբար քշում են պաշտոնյաներին ու պետհաստատությունների աշխատակիցներին, ուսանողներին ու դպրոցականներին։ Այն մասին, որ զորքերը մտցվել են հայկական ջարդերը կանգնեցնելու նպատակով, իշխանությունները լիակատար լռություն են պահպանում։