Եգիպտոսի դատարանը մեկ տարվա բանտարկության է դատապարտել անցյալ տարի գեյից հարցազրույց վերցրած հեռուստալրագրողին, փոխանցում է AFP-ն:
Հեռուստալրագրող Մոհամմեդ ալ Գեյթիին, որը բազմիցս է արտահայտել ընդդեմ ԼԳԲՏ-ի իր դիրքորոշումը, մեղադրվում է նույնասեռականության քարոզչության եւ կրոնը չհարգելու համար:
Գիզայի դատարանը նրան նաեւ տուգանել է 3 հազար եգիպտական ֆունտով (147 դոլար) եւ որոշել, որ նա պատիժը կրելուց հետո մեկ տարի հսկողության տակ կլինի:
Գեյթին 2018 թվականի օգոստոսին LTC մասնավոր հեռուստաալիքի իր թոք շոուում հարցազրույց էր վերցրել գեյից եւ եթերում քննարկել նույնասեռականության հարցը: Հարցազրույցի ժամանակ գեյը հայտնել էր, որ սեքս աշխատող է եղել եւ հրապարակայնորեն խոսել էր այլ տղամարդու հետ իր հարաբերությունների մասին:
Հարցազրույցից հետո լրատվամիջոցների կարգավորման Բարձրագույն խորհուրդը հեռուստաալիքի աշխատանքը 2 շաբաթով կասեցրել էր «մասնագիտական խախտումների» պատճառով: