«Ղեկը աջ» նախաձեռնության անդամ Արթուր Միսակյանը կառավարությանն առաջարկել է անցում կատարել էլեկտրամոբիլներին, Երեւանում ստեղծել լիցքավորման անվճար կայաններ, ինչպես նաեւ ազատել ԱԱՀ-ից:
«Անչափ կարեւոր է ԱԱՀ-ց ազատելը: Անչափ կարեւոր է բնապահպանության տեսանկյունից: Երեւանի համար առանձնապես կարեւոր է: Էլեկտրամոբիլները կարող են օգտագործել առաքման ծառայություններ մատուցող կազմակերպությունները: Սա զգալիորեն կնվազեցնի ապրանքների եւ ծառայությունների արժեքը»,- նշեց Միսակյանը:
Նրա խոսքով՝ հրաշալի կլիներ, եթե կառավարությունը, հաշվի առնելով էլեկտրամոբիլների մատչելիությունը, սկսեր ծառայողական մեքենաները էլեկտրամոբիլներով փոխարինել: Սակայն դրա զարգացման համար անհրաժեշտ են այդպիսի մեքենաների անխափան աշխատանքի ենթակառուցվածքներ:
Լրագրողի դիտարկմանն այն մասին, որ գրեթե 10 օր առաջ այս ամենը քննարկվել է կառավարությունում, եւ հասականալի չէ, թե որն է առաջարկի էությունը, իսկ սպասարկման ոլորտի անցումը էլեկտրամոբիլներին կլորիկ գումար կպահանջի, ինչը զգալիորեն կմեծացնի դրանց արժեքը, Միսակյանը նշեց, որ եթե կառավարությունն այդ մասին խոսում է, նշանակում է մեխանիզմներ էլ կան: