Ուժեղ ձյան տեղումները հարվածել են Արեւելյան Կանադայի նահանգներին: Ինչպես կիրակի օրը հաղորդել է Ազգային օդերեւութաբանական ծառայությունը, օրվա ընթացքում առանձին վայրերում կարող է տեղալ մինչեւ 50 սմ ձյուն:
Հորդառատ տեղումները սկսվել են շաբաթ լույս կիրակիի գիշերը: Այսպիսով, Նոր Շոտլանդիայի ատլանտյան շրջաններում՝ Նյու Բրանսուիկում եւ Էդուրադ արքայազնի կղզում, ըստ կանխատեսման, որոշ վայրերում կթափվի մինչեւ 50 սմ ձյուն, ինչը գերազանցում է տեղումների ամսեկան նորմը:
Միեւնույն ժամանակ, ձյան տեղումներն ուղեկցվում են ուժեղ քամիով, որի արագությունը հասնում են 100 կմ/ժ-ի (28 մ/վրկ): Կանադայի այս հատվածում, ձյան տեղումները տեղ-տեղ կարող են փոխակերպվել սառցե անձրեւի: Տվյալ տարածաշրջանի իշխանությունները, ինչպես հաղորդում է CTV հեռուստաալիքը, այս առնչությամբ պատրաստվում են էլեկտրաէներգիայի լայնածավալ անջատումների` պայմանավորված էլեկտրացանցերի վնասմամբ:
Քվեբեկի եւ Օնտարիոյի արեւելյան նահանգներում նաեւ ձյան առատ տեղումներ են՝ որոշ տեղերում մինչեւ 30 սմ ձյուն կարող է տեղալ: Մոնրեալի, Քվեբեկ Սիթիի (Քվեբեկի նահանգ) եւ Օտտավայի (Օնտարիո նահանգ) օդանավակայանների իշխանությունները տեղեկացրել են, որ տասնյակ թռիչքներ են հետաձգվել եւ չեղյալ հայտարարվել: Հաղորդվում է, որ Մոնրեալում մոտ 13 հազար էլեկտրաէներգիայի սպառողներ արդեն առանց լույսի են մնացել, եւ այդ թիվը կարող է աճել օրվա ընթացքում, հաղորդում է ՏԱՍՍ-ը:
