Իսրայելի հետախուզության նախարար Իսրայել Կացը, մեկնաբանելով կիրակի լույս երկուշաբթի գիշերը Սիրիայի տարածքում իրանական զորամիավորման վրա ավիահարվածները, հայտարարել է, որ Թել Ավիվը շարունակում է հավատարիմ մնալ Թեհրանի նկատմամբ «կարմիր գծերի» քաղաքականությանը, հաղորդում է «ՌԻԱ Նովոստին»:
Դամասկոսում տեղական ժամանակով ժամը 1.15-ի սահմաններում, քաղաքի վրա, երկնքում պայթյուններ սկսեցին որոտալ: Ավելի ուշ իսրայելական զորքերը հայտարարեցին, որ իրենք գրոհում են Սիրիայում «Ալ-Քուդս»-ի իրանական ստորաբաժանման վրա: Սիրիական ռազմական աղբյուրը նշել է, որ Սիրիայի հակաօդային պաշտպանությունը կարողացել է ոչնչացնել դրանց զգալի մասը:
«Իսրայելը շարունակում է հավատարիմ մնալ «կարմիր գծերի» քաղաքականությանը` կապված Սիրիայում Իրանի հենակետման հետ: Այս գիշեր IDF- ի (Իսրայելի Պաշտպանության բանակ) հարձակումը Սիրիայում «Ալ-Քուդս»-ի իրանական ուժերի տեղամասերի վրա հստակ ուղերձ էր Քասեմ Սուլեյմանիին եւ Իսլամական հեղափոխության պահապաններին. «Շտապիր սպանել քեզ սպանողին: Նրանք, ովքեր հրթիռներ են արձակում իսրայելական Հերմոնի ուղղությամբ, ամբողջությամբ կվճարեն դրա համար», - հայտարարել է նախարարը:
Ռուսաստանի Դաշնության պաշտպանության կառավարման ազգային կենտրոնը հաղորդել է, որ կիրակի լույս երկուշաբթի գիշերը Իսրայելի ՌՕՈՒ-ն 3 օդային հարված է հասցրել Սիրիային՝ արեւմտյան, հարավ-արեւմտյան եւ հարավային ուղղություններով։ Զոհվել է 4 եւ վիրավորվել 6 սիրիական զինվորական: Նշվում է, որ Սիրիայի հակաօդային պաշտպանության ուժերի կողմից հարձակման ժամանակ ավելի քան 30 թեւավոր հրթիռներ եւ կառավարող ավիառումբեր են ոչնչացվել:
